واٹس ایپ اکاؤنٹ بند ہونے کا خطرہ، صارفین کو خبردار کردیا

اسلام آباد: پاکستان ٹیلی کمیونی کیشن اتھارٹی (پی ٹی اے) نے واٹس ایپ (WhatsApp) اکاؤنٹس استعمال کرنے والے صارفین کے لیے ایک اہم اور ہنگامی انتباہ جاری کیا ہے، جس میں واٹس ایپ سے منسلک سمز کی فوری تصدیق پر زور دیا گیا ہے۔ پی ٹی اے کی جانب سے سوشل میڈیا پر جاری کردہ ایک خصوصی پیغام میں کہا گیا ہے کہ “آپ کی ڈیجیٹل شناخت آپ کی اپنی ذمہ داری ہے”۔ اس لیے تمام صارفین اپنے واٹس ایپ سے منسلک ایسی سمز کی بروکت تصدیق یقینی بنائیں جو یا تو غیر فعال ہو چکی ہیں یا ان کے نام پر باقاعدہ رجسٹرڈ نہیں ہیں۔

ٹیلی کام واچ ڈاگ کے مطابق، صارفین کے قیمتی اکاؤنٹس، نجی چیٹس، قریبی رابطوں اور مجموعی ڈیجیٹل شناخت کے تحفظ کے لیے یہ انتہائی ناگزیر ہے کہ آپ کا واٹس ایپ نمبر لازمی طور پر کسی فعال اور بائیو میٹرک تصدیق شدہ سم پر چل رہا ہو۔ پی ٹی اے نے صارفین کو ہدایات جاری کی ہیں کہ اگر ضرورت ہو تو بائیو میٹرک تصدیق اور سم کی توثیق کے لیے اپنے متعلقہ موبائل آپریٹر کی قریبی فرنچائز یا کسٹمر سروس سینٹر سے فوری رجوع کریں۔

بیان میں مزید واضح کیا گیا ہے کہ اگر آپ کی موجودہ سم مستقل طور پر بند یا غیر فعال ہو چکی ہے، تو کسی بھی نقصان سے بچنے کے لیے اپنا واٹس ایپ اکاؤنٹ فوری طور پر کسی دوسری تصدیق شدہ اور فعال سم پر منتقل (Migrate) کر لیں۔ پی ٹی اے نے صارفین کو سخت متنبہ کیا ہے کہ وہ واٹس ایپ سے اچانک اور غیر متوقع لاگ آؤٹ ہونے کا انتظار نہ کریں، کیونکہ آپ کا موبائل نمبر ہی انٹرنیٹ کی دنیا میں آپ کی اصل ڈیجیٹل شناخت ہے۔