شمالی وزیرستان میں خارجی کمانڈر عمر 4 دہشت گردوں سمیت جہنم واصل

شمالی وزیرستان کے علاقے سپن وام میں سکیورٹی فورسز نے ایک انٹیلی جنس بیسڈ آپریشن (IBO) کے دوران بڑی کامیابی حاصل کرتے ہوئے فتنہ الخوارج کے ایک انتہائی مطلوب اور ہائی ویلیو ٹارگٹ دہشت گرد سرغنہ کو اس کے 4 ساتھیوں سمیت ہلاک کر دیا ہے۔

سکیورٹی ذرائع کے مطابق، خفیہ معلومات پر مبنی اس کامیاب آپریشن میں مارے جانے والے دہشت گرد سرغنہ کی شناخت خارجی عمر عرف جان میر عرف ‘تور ثاقب’ کے نام سے ہوئی ہے، جس کے سر کی قیمت حکومت کی جانب سے 30 لاکھ روپے مقرر تھی۔ فورسز نے مربوط حکمتِ عملی کے تحت دہشت گردوں کے ٹھکانے کو گھیرے میں لیا اور شدید فائرنگ کے تبادلے کے بعد پانچوں دہشت گردوں کو جہنم واصل کر دیا۔

ذرائع کا کہنا ہے کہ ہلاک ہونے والا فتنہ الخوارج کا یہ اہم کمانڈر سکیورٹی فورسز، قانون نافذ کرنے والے اداروں اور معصوم شہریوں پر کیے جانے والے درجنوں گھناؤنے دہشت گرد حملوں کا ماسٹر مائنڈ اور مرکزی منصوبہ ساز تھا۔ خارجی عمر عرف ثاقب تور نے سپین وام کے علاقے ‘بوبالی مسجد’ کے اطراف اور زیرِ زمین بنکر، خفیہ سرنگیں اور بارودی سرنگوں (آئی ای ڈیز) کا جال بچھا رکھا تھا، جسے سکیورٹی فورسز نے کارروائی کے دوران کامیابی سے ناکارہ بنا دیا۔

دفاعی ماہرین کا کہنا ہے کہ آپریشن ‘عزمِ استحکام’ کے تحت کی جانے والی اس کارروائی میں فتنہ الخوارج کے اہم کمانڈر کی ہلاکت دہشت گرد نیٹ ورک کے لیے ایک بڑا اور کاری ضرب ثابت ہوگی، جس سے شمالی وزیرستان اور گرد و نواح کے علاقوں میں امن و امان کی صورتحال مزید بحال ہوگی۔ ترجمان کے مطابق، ملکی بقا اور استحکام کے لیے فتنہ الخوارج اور فتنہ الہندوستان کے گٹھ جوڑ کے خلاف سکیورٹی فورسز کے ٹارگٹڈ آپریشنز پوری قوت اور کامیابی کے ساتھ جاری رہیں گے