چین کی پھر ایران امریکا تنازع میں پاکستان کی ثالثی کوششوں کی حمایت

عالمی سیاست اور مشرقِ وسطیٰ کی حالیہ کشیدہ صورتحال کے تناظر میں چین نے ایک بار پھر ایران اور امریکہ کے درمیان جاری تنازع کو حل کرنے کے لیے پاکستان کی سفارتی اور ثالثی کی کوششوں کی کھل کر حمایت کا اعلان کر دیا ہے۔

چینی وزارتِ خارجہ کے ترجمان نے بیجنگ میں میڈیا بریفنگ کے دوران اہم بیان دیتے ہوئے کہا ہے کہ چین خطے میں امن و استحکام کے فروغ اور جنگ و جدل کے خاتمے کے لیے ایک منصفانہ، تعمیری اور متوازن ثالث کا کردار ادا کرنے پر پاکستان کے اقدامات کو قدر کی نگاہ سے دیکھتا ہے اور اس سلسلے میں اسلام آباد کی مکمل حمایت کرتا ہے۔

ترجمان چینی وزارتِ خارجہ نے اس موقع پر وزیرِ اعظم پاکستان محمد شہباز شریف کے دورۂ چین کا باضابطہ شیڈول جاری کرتے ہوئے بتایا کہ پاکستانی وزیرِ اعظم 23 سے 26 مئی 2026 تک چین کا انتہائی اہم سرکاری دورہ کریں گے۔ اس چار روزہ اسٹریٹجک دورے کے دوران پاک چین قیادت کے مابین نہ صرف دیرینہ دو طرفہ سفارتی و اقتصادی تعلقات اور سی پیک (CPEC) کے اگلے فیز پر بات ہوگی، بلکہ دونوں ممالک کی اعلٰی قیادت حالیہ علاقائی سکیورٹی اور عالمی امور، بالخصوص ایران امریکہ تنازع پر تفصیلی تبادلۂ خیال کرے گی۔

چینی دفترِ خارجہ کے ترجمان کا مزید کہنا تھا کہ چین اور پاکستان کے مابین ہمیشہ سے سٹرٹیجک ہم آہنگی موجود رہی ہے۔ چین، پاکستان کے ساتھ مل کر مشرقِ وسطیٰ میں امن اور پائیدار استحکام کی جلد سے جلد بحالی کے لیے اپنا ہر ممکنہ اور مثبت کردار ادا کرنے کے لیے تیار ہے تاکہ عالمی معیشت اور خطے کے عوام کو جنگ کے تباہ کن اثرات سے بچایا جا سکے۔ سفارتی ماہرین کے مطابق، وزیرِ اعظم کا یہ دورہ خطے کی جیو پولیٹکس میں پاکستان کے کلیدی کردار کو مزید نمایاں کرے گا۔