پاکستان اور برطانیہ کے درمیان تمام شعبوں میں تعاون بڑھانے پر اتفاق

پاکستان اور برطانیہ کے درمیان تمام شعبوں میں باہمی تعاون کو فروغ دینے پر اتفاق ہوا ہے۔ اس سلسلے میں نائب وزیراعظم و وزیرِ خارجہ اسحاق ڈار نے لندن میں برطانوی وزیرِ خارجہ سے وفود کی سطح پر اہم ملاقات کی، جس میں برطانوی وزیر خارجہ نے مشرقِ وسطیٰ میں امن کے قیام کے لیے پاکستان کے مثبت کردار کی تعریف کی۔ ملاقات کے دوران سندھ طاس معاہدے، بھارت کی جانب سے بین الاقوامی ذمہ داریوں کی مسلسل خلاف ورزی اور افغانستان سے پاکستان کو لاحق دہشت گردی کے خطرات پر تفصیلی تبادلہ خیال کیا گیا۔ اس کے علاوہ، اسحاق ڈار نے برطانوی قومی سلامتی کے مشیر جوناتھن پاول سے بھی ملاقات کی اور زور دیا کہ خطے میں کشیدگی میں کمی اور مسائل کے قابلِ قبول حل کے لیے پاکستان کی سفارتی کوششیں مسلسل جاری ہیں۔