وزیراعظم کمیٹی کی ابتدائی رپورٹ تیار، پمز ہسپتال کے افسران و سٹاف کی غفلت ثابت

پمز ہسپتال میں آتشزدگی کے واقعے پر وزیراعظم کی قائم کردہ تحقیقاتی کمیٹی نے ابتدائی رپورٹ تیار کر لی ہے، جس میں ہسپتال انتظامیہ اور عملے کی شدید غفلت ثابت ہوئی ہے۔ رپورٹ کے مطابق ایمرجنسی صورتحال میں ہسپتال کا عملہ غیر تربیت یافتہ تھا، تالے لگے ہونے، ٹیکنیکل سٹاف کی عدم موجودگی اور آگ بجھانے کے مناسب آلات نہ ہونے کی وجہ سے ریسکیو ٹیموں کو دیواریں توڑ کر اندر داخل ہونا پڑا۔ کمیٹی نے ایگزیکٹو ڈائریکٹر، ڈاکٹرز، نرسز اور سکیورٹی گارڈز سمیت 30 سے زائد افراد کے بیانات اور بائیو میٹرک ریکارڈ کا جائزہ لیا ہے۔ دوسری جانب قومی اسمبلی کی قائمہ کمیٹی برائے صحت نے ڈیوٹی عملے کی معطلی اور وفاقی وزیرِ صحت مصطفیٰ کمال کے استعفے کا مطالبہ کیا ہے، جبکہ اسلام آباد ہائی کورٹ میں جوڈیشل کمیشن کی تشکیل کے لیے درخواست بھی دائر کر دی گئی ہے۔