دنیا سوشل میڈیا سے متاثر، نوجوان حقائق پر مبنی تجزیاتی صلاحیت کو فروغ دیں: فیلڈ مارشل

چیف آف ڈیفنس فورسز فیلڈ مارشل سید عاصم منیر نے پاکستان کے دورے پر آئے ہارورڈ بزنس سکول کے کثیرالملکی طلبہ کے وفد سے ملاقات کی ہے، جس میں علاقائی و عالمی صورتحال، قومی سکیورٹی اور امن و خوشحالی کے فروغ کے لیے جاری کوششوں پر تبادلہ خیال کیا گیا۔ پاک فوج کے شعبہ تعلقات عامہ (آئی ایس پی آر) کے مطابق، ملاقات کے دوران فیلڈ مارشل عاصم منیر نے کہا کہ موجودہ غیر یقینی اور سوشل میڈیا پروپیگنڈے کے دور میں نوجوانوں کو تعلیم، ہنر مندی اور حقائق پر مبنی تجزیے کو اپنانا ہوگا تاکہ وہ مثبت کردار ادا کر سکیں۔ اس موقع پر ہارورڈ کے طلبہ نے پاکستانی عوام کی مہمان نوازی، گرمجوشی اور ملک میں موجود بے پناہ صلاحیتوں و مواقع کی تعریف کی اور اپنے مثبت تجربات کا اظہار کیا۔