پی سی بی کی اجازت کے بغیر کرکٹ ٹورنامنٹ کرانے پر پابندی

پاکستان کرکٹ بورڈ (پی سی بی) نے کوالٹی ڈومیسٹک کرکٹ کے فروغ کے لیے اجازت کے بغیر کرکٹ ٹورنامنٹس کے انعقاد پر پابندی عائد کر دی ہے۔ ذرائع کے مطابق کسی بھی کرکٹ ٹورنامنٹ کے انعقاد کے لیے پی سی بی سے پیشگی اجازت لینا لازمی ہوگا، جبکہ بغیر اجازت کھیلے جانے والے ٹورنامنٹس میں شرکت کرنے والے کھلاڑیوں پر پابندی عائد کی جائے گی۔

ذرائع کا کہنا ہے کہ پی سی بی نے ڈیپارٹمنٹس کو انڈر 23 کرکٹ ٹیمیں تشکیل دینے کے لیے خطوط ارسال کر دیے ہیں، اور ڈیپارٹمنٹل انڈر 23 قومی سطح کے ٹورنامنٹس منعقد کیے جائیں گے۔

مزید فیصلہ کیا گیا ہے کہ کراچی میں کمرشل کرکٹ کے لیے پی سی بی اور آر سی اے کی اجازت لازمی ہوگی، جبکہ خلاف ورزی کی صورت میں کھلاڑیوں کے ساتھ ساتھ امپائرز اور اسکوررز پر بھی پابندی لگائی جائے گی۔