بدین: گدھا منڈی میں گدھوں کی قیمتیں لاکھوں روپے تک پہنچ گئیں

سندھ کے ضلع بدین کے علاقے ٹنڈو غلام علی میں قائم گدھا منڈی میں گدھوں کی قیمتیں لاکھوں روپے تک پہنچ چکی ہیں، جس نے اس منڈی کو علاقے کی ایک منفرد پہچان بنا دیا ہے۔ ٹنڈو غلام علی کی اس روایتی اور منفرد منڈی میں گدھوں کی مختلف نسلیں لائی جاتی ہیں جن کی قیمتیں بھی ان کی خصوصیات کے لحاظ سے لاکھوں میں ہوتی ہیں۔ منڈی میں عام گدھا 40 ہزار سے 80 ہزار روپے تک دستیاب ہے، جبکہ کسی خاص نسل کا گدھا 5 لاکھ روپے تک کی خطیر رقم میں بھی فروخت ہو رہا ہے۔

مقامی بیوپاریوں کا کہنا ہے کہ ان گدھوں کی قیمت صرف ان کی شکل و صورت دیکھ کر نہیں لگائی جاتی، بلکہ ان کی اصل قیمت ان کی طاقت، رفتار اور بوجھ اٹھا کر کام کرنے کی غیر معمولی صلاحیت کے مطابق طے ہوتی ہے۔ اس وقت منڈی میں ہر طرف خریداروں اور بیوپاریوں کا شدید رش دکھائی دے رہا ہے، جہاں ہر شخص اپنی ضرورت کے مطابق بہترین نسل اور سب سے طاقتور گدھے کی تلاش میں مصروف نظر آتا ہے۔