عمران خان کی صحت سے متعلق فیصلے پر سپریم کورٹ سے رجوع کریں گے: اعظم تارڑ

وفاقی وزیرِ قانون و انصاف اعظم نذیر تارڑ نے بانی پی ٹی آئی کی صحت اور علاج سے متعلق عدالتی حکم پر حکومتِ پاکستان کا ردِعمل دیتے ہوئے کہا ہے کہ حکومت نے فیصلے کا تفصیلی جائزہ لیا ہے اور اس پر نظرثانی و وضاحت کے لیے سپریم کورٹ سے رجوع کرنے کا فیصلہ کیا ہے۔ میڈیا سے گفتگو کرتے ہوئے انہوں نے بتایا کہ قانونی ٹیم سے مشاورت کے بعد یہ بات سامنے آئی ہے کہ حکم نامے کے بعض نکات اور امور میں ابہام موجود ہے جسے دور کرنا ضروری ہے۔

وزیرِ قانون نے کہا کہ ملک کی جیلوں میں ہزاروں ایسے قیدی موجود ہیں جو مختلف صحت کے مسائل کا سامنا کر رہے ہیں، لہٰذا یہ سوال اٹھتا ہے کہ کیا سپریم کورٹ کا یہ حکم تمام قیدیوں کے لیے لاگو ہوگا یا یہ محض بانی پی ٹی آئی کے کیس تک محدود رہے گا۔ انہوں نے واضح کیا کہ سزایافتہ قیدیوں کو سرکاری ہسپتالوں میں قانون کے مطابق علاج کی سہولتیں فراہم کی جاتی ہیں اور موجودہ عدالتی فیصلے سے پیدا ہونے والے ابہام کو محض قانونی طریقہ کار کے ذریعے ہی حل کیا جائے گا۔