پاکستان میں پہلی بار سمندر کے کنارے اعلیٰ معیار کی گیس دریافت

پاکستان پیٹرولیم لمیٹڈ (PPL) نے ملک میں پہلی بار سمندر کے ساحلی اور دلدلی علاقے سے اعلیٰ معیار کی گیس کی کامیاب دریافت کا اعلان کیا ہے۔ پی پی ایل کے جاری کردہ اعلامیے کے مطابق، یہ اہم اور منفرد دریافت ضلع سجاول، سندھ میں واقع ان کے آپریشنل “سرانی بلاک” کے دریافتی کنوئیں “ڈولفن” سے ہوئی ہے۔

یہ پاکستان میں جراسک دور کی لوئر انڈس بیسن کی “چلتن فارمیشن” (Chiltan Formation) سے ہائیڈرو کاربن کی سب سے پہلی کامیاب دریافت ہے۔ کمپنی نے بتایا کہ اس دریافت نے خطے میں پیٹرولیم سسٹم کی موجودگی کو ثابت کر دیا ہے، جس کے بعد خشکی کے دلدلی اور ممکنہ کم گہرے سمندری علاقوں میں تیل و گیس کی تلاش (Exploration Frontier) کا ایک نیا دور شروع ہو جائے گا۔