آبنائے ہرمز کھولنے کیلئے امریکا اسلام آباد معاہدے پر عمل کرے: قالیباف

ایران کے چیف مذاکرات کار اور پاسدارانِ انقلاب کے سابق قوماندان، سپیکر ایرانی پارلیمنٹ باقر قالیباف نے واضح کیا ہے کہ آبنائے ہرمز کو دوبارہ کھولنے کے لیے امریکا کو سب سے پہلے ‘اسلام آباد معاہدے’ پر مکمل عمل درآمد کرنا ہوگا۔ انہوں نے کہا کہ امریکا کو ایران پر سے بحری ناکہ بندی اور تیل کی پابندیاں فوری طور پر ختم کرنے کے ساتھ ساتھ منجمد کیے گئے تمام ایرانی اثاثے بحال کرنے ہوں گے۔ باقر قالیباف نے مزید تاکید کی کہ امریکا کو ایران کے خلاف تمام محاذوں پر فوجی کارروائیاں اور دھمکیاں دینا بند کرنا ہوں گی۔ ملکی صورتحال پر بات کرتے ہوئے انہوں نے متنبہ کیا کہ اندرونی اختلافات ملک کو کمزور کرتے ہیں اور دشمنوں کو سازشوں کا موقع دیتے ہیں، لہٰذا ایرانی عوام کو دشمن کی بدامنی پھیلانے کی کوششوں کے مقابلے میں کامل قومی اتحاد برقرار رکھنا چاہیے۔