آبنائے ہرمز پر امریکا ایران ثالثی کی نئی کوششیں کی جائیں گی: قطر

قطر کی وزارتِ خارجہ کے ترجمان ماجد الانصاری نے کہا ہے کہ آبنائے ہرمز کے معاملے پر ایران اور عمان کے درمیان متوقع معاہدے کے بعد قطر کی جانب سے امریکا اور ایران کے درمیان ثالثی کی نئی سفارتی کوششیں شروع کی جائیں گی۔ انہوں نے بتایا کہ تمام ثالث ممالک فی الوقت ایران اور عمان کے درمیان ممکنہ معاہدے کے باضابطہ اعلان کے منتظر ہیں۔

ماجد الانصاری نے مزید وضاحت کرتے ہوئے کہا کہ قطر نے گرائے گئے ایرانی طیاروں کے پائلٹوں کے معاملے پر بات چیت کے لیے ایرانی وفد کو دوحہ کے دورے کی دعوت دی تھی، تاہم تہران کی جانب سے اس کا ابھی تک کوئی جواب موصول نہیں ہوا ہے۔ واضح رہے کہ اس سے قبل ایران کی جانب سے یہ الزام عائد کیا گیا تھا کہ طیارے گرائے جانے کے واقعے کے بعد قطر نے تین ایرانی پائلٹوں کو اپنی تحویل یا قید میں رکھا ہوا ہے۔