آسٹریلیا میں 16 سال سے کم عمر بچوں پر سوشل میڈیا پابندی نافذ، کمپنیوں پر بھاری جرمانے کا اعلان

آسٹریلیا: ملک میں 16 سال سے کم عمر بچوں کے سوشل میڈیا استعمال پر پابندی کا بل آج سے نافذ ہوگیا، جس کے بعد آسٹریلیا یہ پابندی عائد کرنے والا دنیا کا پہلا ملک بن گیا ہے۔

عالمی خبر رساں ادارے کے مطابق نئے قانون کے تحت 16 سال سے کم عمر بچے انسٹاگرام، فیس بک، ایکس، اسنیپ چیٹ، ٹک ٹاک اور یوٹیوب سمیت تمام بڑے سوشل میڈیا پلیٹ فارم استعمال نہیں کرسکیں گے۔

آسٹریلوی حکام نے واضح کیا ہے کہ قانون کی خلاف ورزی پر والدین یا کم عمر بچوں پر کوئی سزا نہیں ہوگی، تاہم سوشل میڈیا کمپنیوں کو 32 ملین امریکی ڈالر تک جرمانہ ہوسکتا ہے۔

حکومت کا کہنا ہے کہ پابندی کا مقصد کم عمر صارفین کو بیہودہ مواد، آن لائن استحصال اور سائبر کرائم سے محفوظ رکھنا ہے۔
تاہم ناقدین کے مطابق اس اقدام سے نوجوان انٹرنیٹ کے غیرمحفوظ گوشوں کی طرف جا سکتے ہیں، جہاں نگرانی کا کوئی نظام موجود نہیں۔

آسٹریلیا میں نوجوانوں کا ردعمل بھی تقسیم ہے؛ کچھ نے اس پابندی کو توہین آمیز قرار دیا، جبکہ متعدد کا کہنا ہے کہ وہ سوشل میڈیا کے بغیر زندگی کے عادی ہوجائیں گے۔

خیال رہے کہ یورپی ممالک بھی بچوں کے سوشل میڈیا استعمال پر سخت قوانین پر غور کر رہے ہیں۔