سحر انگیز آواز سے دلوں کو گرمانے والے قوال امجد صابری کو دنیا چھوڑے 10 برس بیت گئے

پاکستان کے نامور اور ہر دلعزیز قوال امجد صابری کو ہم سے بچھڑے آج پورے 10 برس بیت گئے ہیں، لیکن ان کی سحر انگیز آواز، محبت بھری یادیں اور لازوال کلام آج بھی دنیا بھر میں کروڑوں دلوں میں دھڑک رہے ہیں۔

امجد صابری نے قوالی کے روایتی فن کو نئی نسل میں ایک منفرد، دلنشین اور جدید رنگ کے ساتھ متعارف کروایا۔ انہوں نے قوالی کو محض ایک فن کے طور پر نہیں اپنایا، بلکہ اپنی روح اور خونِ جگر سے اس کی آبیاری کی۔ وہ جب عقیدت کے پھول نچھاور کرتے ہوئے ‘تاجدارِ حرم’ پکارتے، تو سننے والوں کی آنکھیں نم اور دل مدینہ ہو جاتے۔ ان کی پُردرد آواز میں پڑھے گئے کلام ‘بھر دو جھولی میری یا محمد’ اور ‘میرا کوئی نہیں ہے تیرے سوا’ آج بھی سماعتوں میں رس گھولتے ہیں اور ان کی عدم موجودگی کا احساس دلاتے ہیں۔

مقدس مہینے رمضان المبارک میں 22 جون 2016ء کا وہ سیاہ اور تاریک دن پاکستان کی موسیقی، ثقافت اور قوالی کی تاریخ کا ایک بہت بڑا سانحہ تھا، جب اس درویش صفت فنکار کو ہمیشہ کے لیے ہم سے چھین لیا گیا۔ امجد صابری کو کراچی کے علاقے لیاقت آباد میں اس وقت بزدلانہ دہشت گردی کا نشانہ بنایا گیا جب وہ ایک ٹی وی پروگرام کے لیے جا رہے تھے۔ موٹر سائیکل پر سوار سفاک دہشت گردوں نے ان کی گاڑی پر اندھا دھند فائرنگ کی، جس کے بعد انہیں شدید زخمی حالت میں عباسی شہید ہسپتال منتقل کیا گیا لیکن وہ زخموں کی تاب نہ لاتے ہوئے خالقِ حقیقی سے جا ملے۔

آج ان کی دسویں برسی کے موقع پر مداح انہیں یاد کر رہے ہیں، کیونکہ امجد صابری اپنی بے لوث فنی و مذہبی خدمات اور عاجزانہ شخصیت کے باعث رہتی دنیا تک عوام کے دلوں میں زندہ رہیں گے۔