آزاد کشمیر میں صدر اور وزیراعظم پیپلز پارٹی کا، پھر دھاندلی کیسے ہوگئی؟ امیر مقام

وفاقی وزیر اور مسلم لیگ (ن) کے سینئر رہنما انجینئر امیر مقام نے پیپلز پارٹی کی جانب سے عائد کیے جانے والے دھاندلی کے الزامات کا آڑے ہاتھوں لیتے ہوئے کرارا جواب دیا ہے۔ انہوں نے سوال اٹھایا کہ جب آزاد کشمیر میں صدر اور وزیراعظم دونوں ہی پیپلز پارٹی سے تعلق رکھتے ہیں، تو ایسے میں الیکشن میں دھاندلی کیسے ممکن ہو سکتی ہے؟ ان کا کہنا تھا کہ پیپلز پارٹی کو بلاجواز الزام تراشی اور “بلیم گیم” کے بجائے عوام کے پاس جا کر یہ پوچھنا چاہیے کہ انہوں نے انہیں ووٹ کیوں نہیں دیا، اور عوامی فیصلے کو کھلے دل اور شائستگی سے تسلیم کرنا چاہیے۔

امیر مقام نے مزید کہا کہ میرپور ڈویژن کے عوام نے مسلم لیگ (ن) کی شاندار کارکردگی اور عوامی خدمت پر اعتماد کرتے ہوئے انہیں اپنا ووٹ دیا ہے۔ پیپلز پارٹی کی جانب سے بغیر کسی ثبوت اور شواہد کے محض سیاسی پوائنٹ اسکورنگ کے لیے دھاندلی کے الزامات لگائے جا رہے ہیں، جن سے حاصل کچھ نہیں ہونے والا۔ واضح رہے کہ یہ سیاسی نوک جھونک ایسے وقت میں سامنے آئی ہے جب آزاد جموں و کشمیر کے دوسرے مرحلے کے تحت مظفر آباد ڈویژن کی 9 اور مہاجرین کی 12 نشستوں پر انتخابی عمل جاری ہے۔