پشاور میں مسلح افراد کی اندھا دھند فائرنگ سے 2 افراد جاں بحق، 4 زخمی

خیبر پختونخوا کے دارالحکومت پشاور میں فائرنگ کے ایک خونریز واقعے میں 2 افراد جاں بحق جبکہ 4 افراد شدید زخمی ہو گئے ہیں۔ پولیس کے مطابق یہ افسوسناک واقعہ تھانہ فقیر آباد کی حدود میں واقع دین بہار کالونی میں پیش آیا، جہاں نامعلوم مسلح افراد نے اچانک اندھا دھند فائرنگ کر دی۔ گولیاں لگنے کے نتیجے میں 2 افراد موقع پر ہی دم توڑ گئے جبکہ 4 افراد شدید زخمی ہوئے۔

واقعے کی اطلاع ملتے ہی ریسکیو اور پولیس کی امدادی ٹیمیں فوری طور پر جائے وقوعہ پر پہنچ گئیں اور جاں بحق افراد کی لاشوں سمیت زخمیوں کو فوری طبی امداد کی فراہمی کے لیے قریبی اسپتال منتقل کر دیا گیا۔ دوسری جانب تفتیشی حکام نے علاقے کو گھیرے میں لے کر جائے وقوعہ سے اہم شواہد اکٹھے کر لیے ہیں۔ پولیس کا کہنا ہے کہ واقعے کے پسِ پردہ وجوہات کا تعین کرنے کے لیے مختلف زاویوں سے قانونی کارروائی اور باقاعدہ تحقیقات کا آغاز کر دیا گیا ہے