علیمہ خان کا مقدمہ سیاسی انتقام ہے، بریت کی درخواست دائر: فیصل ملک

علیمہ خان نے اپنے وکیل فیصل ملک کے ہمراہ انسداد دہشت گردی عدالت راولپنڈی کے باہر میڈیا سے گفتگو کی۔ وکیل فیصل ملک کا کہنا تھا کہ 26 نومبر کے مقدمے میں علیمہ خان کے خلاف کوئی ٹھوس مواد موجود نہیں، اسی بنیاد پر آج عدالت میں بریت کی درخواست دائر کی گئی ہے۔ ان کے مطابق درخواست کے باوجود گواہوں کے بیانات ریکارڈ کیے گئے، جو سیاسی انتقامی کارروائی کا ثبوت ہے۔ انہوں نے کہا کہ استغاثہ علیمہ خان کا کیس تیزی سے چلانا چاہتا ہے اور عدالتوں سے انصاف کی توقع ہے۔

علیمہ خان نے گفتگو میں کہا کہ بانی پی ٹی آئی نے گزشتہ سال 22 نومبر کو پرامن احتجاج کی کال دی تھی اور ان پر صرف یہ الزام ہے کہ انہوں نے بانی کا پیغام عوام تک پہنچایا۔ انہوں نے الزام عائد کیا کہ پولیس اہلکاروں کو جھوٹی گواہی کے لیے پیش کیا جاتا ہے اور جھوٹی گواہی دینے والوں کو بھی سزا ملنی چاہیے۔

علیمہ خان کا کہنا تھا کہ پاکستان میں انصاف کا نظام کمزور ہو چکا ہے، اگرچہ عدلیہ میں اچھے ججز موجود ہیں لیکن ان کی بات نہیں سنی جاتی۔ انہوں نے کہا کہ بانی پی ٹی آئی اور بشریٰ بی بی کے خلاف توشہ خانہ کیس بوگس ہے اور معمولی الزامات پر سخت سزائیں دی گئیں۔ ان کے مطابق بانی پی ٹی آئی نے ہمیشہ رول آف لا کی بات کی اور آج بھی اپنے مقدمات کا سامنا کرنے کے مؤقف پر قائم ہیں۔

انہوں نے کہا کہ بانی پی ٹی آئی کو ملک سے جانے کی آفرز بھی ہوئیں، مگر انہوں نے انکار کیا۔ علیمہ خان نے مزید کہا کہ اے ٹی سی کے ججز بھی کسی منصوبے کے تحت چلتے نظر آتے ہیں، جبکہ میڈیا کے نمائندوں کو بطور گواہ پیش کیا جائے گا۔ ان کا کہنا تھا کہ بانی پی ٹی آئی 90 فیصد عوام کی نمائندگی کرتے ہیں اور مذاکرات کی بات کرنے والے بانی کے مؤقف کی نمائندگی نہیں کرتے۔