الاسکا کے شہر اتقیاگوِک میں 64 دن کی قطبی رات کا آغاز ، سورج اگلے سال تک غائب رہے گا

امریکی ریاست الاسکا کے سب سے شمالی شہر اتقیاگوِک (Utqiaġvik) میں قطبی رات (Polar Night) کا منفرد اور حیران کن موسم شروع ہوچکا ہے، جہاں سورج نے آخری بار افق پر جھلک دکھا کر 64 دن کے لیے رخصت لے لی۔ اب یہ خطہ 22 جنوری 2026 تک سورج کی روشنی سے محروم رہے گا۔

زمین کے محور کے جھکاؤ کے باعث اتقیاگوِک میں ہر سال دو ماہ سے زائد عرصہ سورج افق سے اوپر نہیں آ پاتا۔ تاہم اس دوران شہر مکمل اندھیرے میں نہیں ڈوبتا، بلکہ روزانہ چند گھنٹے ’’سِوِل ٹوائلائٹ‘‘ نامی ہلکی نیلی روشنی چھائی رہتی ہے بالکل ویسی جیسے طلوعِ آفتاب سے پہلے کی دھیمی چمک۔

تقریباً 4,400 آبادی پر مشتمل یہ دور دراز بستی فیئر بینکس سے 500 میل کے فاصلے پر واقع ہے۔ اس علاقے میں پانچویں صدی عیسوی کے قدیم آثار بھی ملتے ہیں، جو اسے تاریخی طور پر بھی منفرد شناخت دیتے ہیں۔

سورج کی طویل غیر موجودگی خطے کو اندھیرے کے ساتھ ساتھ شدید سرد ہواؤں، برفانی درجۂ حرارت اور تیز رفتار موسمی تبدیلیوں کی لپیٹ میں لے آتی ہے۔ قطبی رات کے دوران ٹمپریچر خطرناک حد تک نیچے چلا جاتا ہے، اور اسی ماحول میں ’’پولر ورٹیکس‘‘ جیسے برفانی کم دباؤ کے نظام بنتے ہیں جو کبھی کبھار جنوبی علاقوں تک بھی اثر چھوڑ دیتے ہیں۔

دلچسپ امر یہ ہے کہ یہی شہر گرمیوں میں تقریباً تین ماہ تک سورج کی مسلسل روشنی میں نہایا رہتا ہے، اور اسی دوران بیرو ہائی اسکول کی امریکا کی سب سے شمالی فٹ بال ٹیم اپنا سیزن مکمل روشنی میں کھیلتی ہے۔

الاسکا کا یہ حیرت انگیز موسمی سفر ایک بار پھر جاری ہے، اور اتقیاگوِک تاریکی سے روشنی کے اس سالانہ غیر معمولی چکر میں داخل ہوچکا ہے۔