اجے بنگا کا دورہ پاکستان، عالمی بینک کے 10سالہ فریم ورک پر پیش رفت متوقع

عالمی بینک کے صدر اجے بنگا پاکستان کے اہم دورے پر پہنچ گئے ہیں اور وہ چار فروری تک ملک میں قیام کریں گے۔ ذرائع کے مطابق اس دورے کے دوران عالمی بینک کے صدر پاکستان کے اعلیٰ حکومتی عہدیداروں سے ملاقاتیں کریں گے۔

ذرائع کا کہنا ہے کہ اجے بنگا کے دورے میں معاشی اصلاحات، ترقیاتی منصوبوں اور بھارت کے ساتھ جاری آبی تنازعے پر تبادلہ خیال متوقع ہے۔ عالمی بینک کے صدر وزیراعظم، ڈپٹی وزیراعظم، وزیر خزانہ، وزیر توانائی اور اقتصادی امور سے وابستہ حکام سے ملاقات کریں گے۔

اجے بنگا کو پاکستان کی معاشی صورتحال، اصلاحاتی ایجنڈے اور ترقیاتی منصوبوں کی ترجیحات پر بریفنگ دی جائے گی۔ ذرائع کے مطابق عالمی بینک اور پاکستان کے درمیان دس سالہ کنٹری پارٹنرشپ فریم ورک پر عمل درآمد کے حوالے سے بھی اہم پیش رفت کا امکان ہے۔

اس فریم ورک کے تحت عالمی بینک 2035 تک پاکستان کو مجموعی طور پر بیس ارب ڈالر فراہم کرے گا، جو مختلف ترقیاتی اور معاشی منصوبوں پر خرچ کیے جائیں گے۔