امریکہ: اے آئی الٹراساؤنڈ آلے کو معائنے کیلئے استعمال کی منظوری دے دی

نیویارک: امریکی ریگولیٹری ادارے (FDA) نے ‘بٹر فلائی نیٹ ورک’ کے تیار کردہ جدید ترین اے آئی الٹراساؤنڈ ٹول کو مریضوں کے معائنے کے لیے کلیئرنس دے دی ہے۔ یہ آلہ اپنی نوعیت کی پہلی ایسی ٹیکنالوجی ہے جو روایتی بھاری بھرکم مشینوں کے بجائے ایک واحد سلیکون چپ پر مشتمل ہے، جس سے پورے جسم کی اسکیننگ ممکن ہے۔

اس آلے کی سب سے بڑی خصوصیت اس کا خودکار نظام ہے جو محض دو منٹ کے اندر حمل کی مدت (Gestational Age) کا درست تخمینہ لگا سکتا ہے۔ اس کے لیے کسی خاص طبی مہارت یا طویل تربیت کی ضرورت نہیں ہے، بلکہ یہ اے آئی ٹول خود ہی اسکرین پر ڈاکٹر یا ہیلتھ ورکر کی رہنمائی کرتا ہے۔ اس ماڈل کو 21 ملین سے زائد الٹراساؤنڈ تصاویر پر ٹرین کیا گیا ہے تاکہ 16 سے 37 ہفتوں کے دوران حمل کے نتائج میں سو فیصد درستی کو یقینی بنایا جا سکے۔

کمپنی کا کہنا ہے کہ یہ ٹیکنالوجی افریقی ممالک ملاوی اور یوگنڈا میں پہلے ہی کامیاب تجربات کے بعد اب امریکی مارکیٹ میں متعارف کرائی جا رہی ہے۔ ایف ڈی اے کا ماننا ہے کہ مصنوعی ذہانت کا طبی آلات میں استعمال نہ صرف علاج کے معیار کو بہتر بنائے گا بلکہ دیہی علاقوں اور ایمرجنسی وارڈز میں فوری فیصلے کرنے میں بھی مددگار ثابت ہوگا۔