اسلام آباد مذاکرات کا دوسرا راؤنڈ: وزیر داخلہ محسن نقوی کی امریکی سفیر سے ملاقات، سیکیورٹی انتظامات پر بریفنگ

وفاقی وزیر داخلہ محسن نقوی نے ڈپلومیٹک انکلیو میں امریکی سفارت خانے کا اہم دورہ کیا، جہاں انہوں نے امریکی سفیر نیٹلی بیکر سے ملاقات کی۔ اس اعلیٰ سطحی ملاقات میں پاک امریکہ تعلقات کے فروغ، علاقائی سلامتی کی تازہ ترین صورتحال اور بالخصوص اسلام آباد میں ہونے والے پاک-امریکہ-ایران مذاکرات کے دوسرے راؤنڈ کے حوالے سے تفصیلی تبادلہ خیال کیا گیا۔ امریکی سفیر نیٹلی بیکر نے مشرقِ وسطیٰ اور خطے میں جاری کشیدگی کو کم کرنے کے لیے پاکستان کے مخلصانہ اور کلیدی کردار کو سراہتے ہوئے امن کی کوششوں کی تائید کی۔

وزیر داخلہ محسن نقوی نے امریکی سفیر کو اسلام آباد مذاکرات کے دوسرے مرحلے کے لیے کیے گئے فول پروف سیکیورٹی انتظامات پر بریفنگ دیتے ہوئے بتایا کہ حکومتِ پاکستان نے تمام عالمی مندوبین اور “خاص مہمانوں” کے لیے غیر معمولی حفاظتی اقدامات کیے ہیں۔ انہوں نے اس امید کا اظہار کیا کہ مذاکرات کا یہ دوسرا دور کامیاب رہے گا اور خطے میں پائیدار امن کی راہ ہموار ہوگی۔ اس اہم موقع پر وزیر داخلہ کے ہمراہ ڈی جی ایف آئی اے ڈاکٹر عثمان انور، چیف کمشنر اسلام آباد سہیل اشرف، آئی جی اسلام آباد پولیس علی ناصر رضوی اور ڈپٹی کمشنر عرفان میمن بھی موجود تھے، جو مذاکرات کے پرامن انعقاد کے لیے انتظامی اور حفاظتی ذمہ داریاں نبھا رہے ہیں۔