کانگو میں ایبولا سے 65 افراد ہلاک، 246 متاثر، سرحد پار پھیلنے کا خطرہ

افریقہ کی صحتِ عامہ کی ایجنسی (Africa CDC) نے جمہوریہ کانگو میں ایبولا وائرس کی ایک نئی اور خطرناک وبا پھیلنے کی باقاعدہ تصدیق کر دی ہے۔ اس وائرس کے پھیلاؤ نے خطے میں شدید ہیلتھ ایمرجنسی کی صورتحال پیدا کر دی ہے، جس کے اثرات پڑوسی ممالک تک پہنچنے کا خطرہ ظاہر کیا جا رہا ہے۔طبی حکام کے مطابق، کانگو کے صوبے ‘ایتوری’ میں اب تک ایبولا کے باعث 65 افراد جاں بحق ہو چکے ہیں، جبکہ 246 مشتبہ کیسز ریکارڈ کیے جا چکے ہیں۔ یہ وبا اس وقت مشرقی کانگو کے دو اہم ترین طبی علاقوں، مونگوالو اور روامپارا ہیلتھ زونز میں تیزی سے پھیل رہی ہے۔ طبی ماہرین اور عالمی ادارہ صحت کے اہلکار اس وقت لیبارٹریز میں اس بات کی باریک بینی سے تحقیقات کر رہے ہیں کہ آیا اس حالیہ وبا میں ‘ایبولا زائر’ (Ebola Zaire) کے اثرات شامل ہیں یا نہیں۔ واضح رہے کہ ‘زائر’ اس وائرس کا سب سے مہلک اور خطرناک ترین ورژن مانا جاتا ہے جس میں شرحِ اموات بہت زیادہ ہوتی ہے۔ متاثرہ علاقہ یوگنڈا اور جنوبی سوڈان کی سرحدوں کے بالکل قریب واقع ہے، جس کی وجہ سے خطے کے دیگر ممالک کو ہائی الرٹ کر دیا گیا ہے:

• کانگو کے ہمسایہ ملک یوگنڈا نے بھی اپنے ہاں ایبولا وائرس سے ایک موت کی تصدیق کر دی ہے۔

• حکام نے خبردار کیا ہے کہ اگر سرحدوں پر سخت طبی سکریننگ نہ کی گئی تو یہ وبا انتہائی تیزی سے یوگنڈا اور جنوبی سوڈان میں داخل ہو کر پورے خطے کو اپنی لپیٹ میں لے سکتی ہے۔

بین الاقوامی طبی تنظیموں نے متاثرہ علاقوں میں امدادی کارروائیاں شروع کر دی ہیں تاکہ ویکسینیشن اور قرنطینہ (Quarantine) کے ذریعے وائرس کے مزید پھیلاؤ کو روکا جا سکے۔