پارلیمنٹ ہاؤس: اپوزیشن چیمبر میں علامہ ناصر عباس اور محمود خان اچکزئی کی ملاقات، آئین تحفظ اجلاس پر اہم مشاورت

اسلام آباد کے پارلیمنٹ ہاؤس میں اپوزیشن چیمبر کے اندر قائد حزبِ اختلاف سینیٹ علامہ راجہ ناصر عباس اور قائد حزبِ اختلاف قومی اسمبلی محمود خان اچکزئی کے درمیان ایک اہم اور مفصل ملاقات ہوئی ہے۔ اس اعلیٰ سطحی اپوزیشن اجلاس میں سینیٹ کے چیف وہپ سینیٹر زیشان خان اخوانزادہ، تحریک تحفظِ آئینِ پاکستان کے مرکزی ترجمان حسین احمد یوسفزئی اور خالد یوسف چوہدری، سابق وزیراعظم عمران خان کے لیگل کونسل کے اراکین، اور مجلس وحدت مسلمین (MWM) کے مرکزی ڈپٹی جنرل سیکرٹری ظہیر نقوی بھی موجود تھے۔

ملاقات کے دوران ملک کی موجودہ سیاسی و آئینی صورتحال اور بالخصوص ‘تحریک تحفظِ آئینِ پاکستان’ کے زیرِ اہتمام بلائے گئے اہم ترین سربراہی اجلاس کے تمام پہلوؤں پر تفصیلی مشاورت کی گئی۔ اجلاس میں دونوں اہم اپوزیشن رہنماؤں نے آئندہ کے مشترکہ لائحہ عمل، پارلیمانی حکمتِ عملی اور حکومت کے خلاف احتجاجی تحرک کو منظم کرنے سے متعلق اہم امور پر خیالات کا تبادلہ کیا۔

ذرائع کے مطابق دونوں رہنماؤں نے آئین و قانون کی حکمرانی اور جمہوری قدروں کی بحالی کے لیے مشترکہ جدوجہد کو تیز کرنے پر اتفاق کیا۔ ملاقات میں اپوزیشن اتحاد کو مزید فعال بنانے اور کل ہونے والے سربراہی اجلاس میں متفقہ اعلامیہ اور مستقبل کا روڈ میپ پیش کرنے کے حوالے سے حتمی نکات کو شکل دی گئی۔