افغان طالبان حکومت کا تاجروں کو پاکستان سے تجارت ختم کرنے کا حکم

کابل: افغان طالبان حکومت نے تاجروں کو پاکستان کے ساتھ تجارتی تعلقات ختم کرنے کی ہدایت دے دی۔
افغان نائب وزیراعظم برائے اقتصادی امور ملا عبدالغنی برادر نے افغان تاجروں کو کہا ہے کہ وہ پاکستان پر تجارتی انحصار ختم کریں اور متبادل راستوں کو اپنائیں۔

افغان میڈیا کے مطابق ملا برادر نے واضح کیا کہ اگر کسی تاجر نے 3 ماہ کی مہلت کے بعد بھی پاکستان کے ساتھ تجارت جاری رکھی تو حکومت اس کے ساتھ کوئی تعاون نہیں کرے گی۔
انہوں نے پاکستان سے درآمد شدہ ادویات کے معیار کو ناقص قرار دیتے ہوئے کہا کہ ادویات کے درآمد کنندگان کو 3 ماہ کے اندر پاکستان کے ساتھ اپنے تجارتی کھاتے بند کرنے ہوں گے۔

ملا برادر کا کہنا تھا کہ افغانستان کو اب دیگر خطے کے ممالک کے ساتھ تجارت کے متبادل راستے دستیاب ہیں، اور اقتصادی تعلقات پہلے سے زیادہ مضبوط ہو گئے ہیں۔
ان کا مزید کہنا تھا کہ اگر پاکستان تجارتی راستے دوبارہ کھولنا چاہتا ہے تو اسے یہ ضمانت دینا ہوگی کہ آئندہ یہ راستے بند نہیں کیے جائیں گے۔