گوگل کا صارفین کے لئے نیا سکیورٹی فیچر متعارف

ٹیکنالوجی کی معروف کمپنی گوگل نے اپنے صارفین کے لیے ایک نیا اور جدید سکیورٹی فیچر متعارف کرا دیا ہے، جس کے تحت اب صارف سیلفی ویڈیو کی مدد سے اپنے گوگل اکاؤنٹ میں سائن اِن کر سکیں گے۔ کمپنی کے مطابق اس فیچر کو چالو کرنے کے لیے صارف کو ابتدائی طور پر ایک مختصر سیلفی ویڈیو ریکارڈ کرنا ہو گی، جس میں چہرے کے مختلف زاویوں کی تصدیق کے لیے چند ہدایات پر عمل کرنا پڑے گا۔ اس کے بعد اگر صارف اپنا پاس ورڈ بھول جائے تو وہ نئی سیلفی ویڈیو بنا کر اپنے اکاؤنٹ تک رسائی دوبارہ حاصل کر سکے گا، جہاں گوگل کا سسٹم نئی ویڈیو کا پہلے سے محفوظ شدہ انکرپٹڈ ویڈیو کے ساتھ موازنہ کر کے شناخت کی تصدیق کرے گا۔ کمپنی نے واضح کیا ہے کہ جعلی تصاویر یا ویڈیوز (Deepfakes) سے بچاؤ کے لیے سکیورٹی کی متعدد سخت تہیں شامل کی گئی ہیں اور یہ ڈیٹا مکمل طور پر محفوظ رہے گا، جبکہ صارف جب چاہے اپنی ویڈیو حذف کر سکتا ہے۔