افغانستان نے اپنی نئی ٹی 20 لیگ متعارف کرا دی

افغانستان کرکٹ بورڈ (اے سی بی) نے نئی ٹی 20 لیگ افغانستان پریمیئر لیگ (اے پی ایل) کے آغاز کا باضابطہ اعلان کر دیا ہے۔ اے سی بی کی جانب سے جاری پریس ریلیز کے مطابق لیگ کے افتتاحی سیزن میں افغانستان کے پانچ شہروں کی نمائندگی کرنے والی فرنچائزز شامل ہوں گی۔

لیگ میں افغانستان کے نمایاں قومی کھلاڑیوں کے ساتھ ساتھ بین الاقوامی اسٹارز اور ابھرتے ہوئے مقامی ٹیلنٹ کو بھی کھیلنے کا موقع دیا جائے گا۔ اس اقدام کا مقصد افغان کرکٹ کو مزید مضبوط بنانا اور نوجوان کھلاڑیوں کو عالمی سطح پر سامنے لانا ہے۔

اے سی بی کے چیئرمین میر واعظ اشرف نے دبئی میں ہفتے کے روز لیگ کی افتتاحی تقریب کے موقع پر کہا کہ افغانستان پریمیئر لیگ افغان کرکٹ کے سفر میں ایک اہم سنگِ میل ثابت ہوگی۔ ان کا کہنا تھا کہ یہ لیگ نہ صرف کھلاڑیوں کے لیے نئے مواقع پیدا کرے گی بلکہ نئی نسل کو متاثر کرنے کے ساتھ افغانستان کرکٹ کو عالمی سطح پر اجاگر کرنے میں بھی مدد دے گی۔

پریس ریلیز کے مطابق ٹورنامنٹ کا پہلا سیزن اکتوبر 2026 میں متحدہ عرب امارات میں شروع کیے جانے کا منصوبہ ہے، جبکہ پلیئر ڈرافٹ یا آکشن جون یا جولائی 2026 میں متوقع ہے۔

واضح رہے کہ افغانستان کرکٹ بورڈ اس سے قبل 2018 کے اوائل میں بھی افغانستان پریمیئر لیگ کے نام سے ایک ٹورنامنٹ منعقد کر چکا ہے، تاہم اس وقت لیگ کا صرف ایک ہی سیزن کھیلا گیا تھا۔