سرحد پار عسکری کارروائیاں ممنوع، خلاف ورزی کرنے والے کو باغی قرار دیا جائے گا ، افغان علما، مشائخ کا اعلامیہ

کابل یونیورسٹی میں علما، مشائخ، سیاسی و مذہبی رہنماؤں کے بڑے اجلاس میں بیرون ملک عسکری سرگرمیوں پر سخت پابندی عائد کرتے ہوئے مشترکہ اعلامیہ جاری کیا گیا، جس میں واضح کیا گیا کہ افغانستان سے باہر کسی بھی شخص کو عسکری کارروائی کی اجازت نہیں ہوگی، اور ایسا کرنے والا ’’باغی‘‘ تصور ہوگا۔

اجلاس میں ایک ہزار سے زائد علما نے شرکت کی اور افغان حکومت پر زور دیا کہ وہ اپنی سرزمین کسی دوسرے ملک کے خلاف استعمال نہ ہونے دے اور ملکی خودمختاری کے تحفظ کے لیے سخت اقدامات کرے۔

اعلامیہ کو پاکستان کے دیرینہ مطالبے سے ہم آہنگ قرار دیا جا رہا ہے۔ پاکستان بارہا افغان طالبان سے مطالبہ کرتا رہا ہے کہ افغانستان کی سرزمین پاکستان کے خلاف استعمال نہ ہونے دی جائے، تاہم طالبان کی جانب سے اس پر کوئی مؤثر عملی قدم سامنے نہیں آیا۔
استنبول مذاکرات کے تین ادوار بھی بے نتیجہ رہے، کیونکہ افغان طالبان پاکستان کی جانب سے مانگی گئی تحریری ضمانت دینے میں ناکام رہے۔

ماہرین کے مطابق افغان علما کا یہ اعلامیہ خطے کی سکیورٹی صورتحال پر اہم اثرات مرتب کر سکتا ہے اور طالبان کے طرزِ عمل پر بھی سوالات اٹھاتا ہے۔ افغان میڈیا نے اس پیشرفت کو افغانستان کی سیاسی اور سکیورٹی حکمت عملی میں ایک اہم موڑ قرار دیا ہے۔