پاکستان اور کویت کے درمیان ‘پروٹوکول معاہدہ 2026’ پر دستخط

راولپنڈی: کویت کے اعلیٰ سطح کے وفد نے وزارتِ دفاع راولپنڈی کا دورہ کیا، جہاں کویتی وزیر دفاع شیخ عبداللہ علی عبداللہ السالم الصباح کی قیادت میں ان کی اپنے پاکستانی ہم منصب، وزیر دفاع خواجہ محمد آصف سے اہم ملاقات ہوئی۔

کویتی مسلح افواج کے چیف آف جنرل سٹاف لیفٹیننٹ جنرل خالد درج سعد الشریعان بھی وفد کے ہمراہ موجود تھے۔ ملاقات کے دوران باہمی دلچسپی کے امور، خطے کی سیکیورٹی صورتحال، دوطرفہ دفاعی تعلقات کو مضبوط بنانے اور عسکری روابط کی بہتری پر تفصیلی تبادلہ خیال کیا گیا۔

اس اہم وزٹ کے موقع پر پاکستان اور کویت کے مابین “پروٹوکول معاہدہ 2026” پر باضابطہ دستخط کیے گئے۔ نیا معاہدہ سابقہ “دفاعی تعاون معاہدہ 2023” کے تحت قائم موجودہ عسکری شراکت داری کو مزید وسعت اور مضبوطی فراہم کرے گا۔ اس نئے فریم ورک کے تحت پاک افواج کویتی مسلح افواج کو عسکری تربیت، آپریشنل صلاحیتوں میں اضافے، بارڈر مینجمنٹ اور دیگر مشترکہ دفاعی شعبوں میں جامع معاونت فراہم کریں گی۔

وزارتِ دفاع کے ترجمان کے مطابق یہ اہم معاہدہ دونوں برادر مسلم ممالک کے مابین قائم گہرے اعتماد، باہمی احترام اور یکساں تزویراتی مفادات کا آئینہ دار ہے۔ دونوں رہنماؤں نے خطے میں پائیدار امن، سلامتی اور پائیدار استحکام کے فروغ کے لیے باہمی شراکت داری کو مزید آگے بڑھانے کے پختہ عزم کا اعادہ کیا۔