ونٹر اولمپکس کے لیے خصوصی لباس: کھلاڑیوں کو اندر سے گرم رکھنے کی جدید ٹیکنالوجی

ایڈیڈاس نے ونٹر اولمپکس 2026 کے لیے ایک جدید اور خصوصی لباس تیار کیا ہے جو کھلاڑیوں کو سرد موسم میں اندر سے گرم رکھے گا۔ یہ لباس، جسے کلیماوارم سسٹم کہا جاتا ہے، بظاہر ایک عام ٹریک سوٹ جیسا لگتا ہے، لیکن اس کے اندر حرارت فراہم کرنے والے کئی پیڈز نصب کیے گئے ہیں جو اہم پٹھوں کو گرم رکھنے میں مددگار ہیں۔

ایڈیڈاس کی ایتھلیٹ پرفارمنس ڈائریکٹر مارگریٹا ریکولیا کے مطابق کمپنی کئی برسوں سے اس نوعیت کے نظام پر کام کر رہی ہے۔ 2012 کے لندن اولمپکس میں ایڈیڈاس نے ٹریک سائیکل سواروں کے لیے اسی طرح کے آلات متعارف کرائے تھے تاکہ پٹھوں کا موزوں درجہ حرارت برقرار رکھ کر طاقت کا مؤثر استعمال ممکن بنایا جا سکے۔

نیا لباس خاص طور پر ونٹر اولمپکس کے لیے تیار کیا گیا ہے تاکہ کھلاڑی صفر یا اس سے کم درجہ حرارت میں عالمی معیار کی کارکردگی دکھا سکیں۔ لباس میں موجود حرارتی پیڈز ان پٹھوں پر مرکوز ہیں جنہیں گرم رکھنا ضروری ہوتا ہے، اور اضافی ’بوسٹ موڈ’ فیچر ضرورت پڑنے پر اضافی حرارت فراہم کرتا ہے۔

ماہرین کا کہنا ہے کہ یہ لباس کھلاڑیوں کی کارکردگی کو بہتر بنانے کے ساتھ ساتھ چوٹ لگنے کے خطرات کو کم کرنے میں بھی مددگار ثابت ہوگا۔