عمران خان کی نہتی، باپردہ خواتین کو بالوں سے گھسیٹنا قانون کی توہین ہے، راجہ ناصر 

اڈیالہ جیل کے باہر سابق وزیراعظم عمران خان کی بہنوں پر پولیس کے ہاتھوں بدسلوکی اور واٹر کینن کے استعمال نے انسانی حقوق کے عالمی دن سے چند لمحے قبل ملک میں بنیادی آزادیوں کی صورتحال پر سنگین سوالات اٹھا دیے ہیں۔

وائس چیئرمین تحریکِ تحفظِ آئین پاکستان اور سربراہ مجلس وحدت المسلمین سینیٹر علامہ راجہ ناصر عباس نے ردعمل دیتے ہوئے کہا کہ عدالتوں کے واضح احکامات کے باوجود عمران خان کو اہلِ خانہ سے ملاقات کی اجازت نہ دینا، اور نہتی، باپردہ بزرگ خواتین کو بالوں سے گھسیٹنا اور ہراساں کرنا آئین، قانون اور انسانی احترام کی کھلی توہین ہے۔

انہوں نے کہا کہ یہ توہین صرف عمران خان کی بہنوں کی نہیں بلکہ پاکستان کی ہر ماں، بہن اور بیٹی کی بے حرمتی ہے۔ ایسا ظلم قرآن، آئین اور عالمی انسانی حقوق کے تمام تقاضوں کے منافی ہے، تاہم تاریخ گواہ ہے کہ ظلم کبھی قائم نہیں رہتا۔

سینیٹر راجہ ناصر عباس نے کہا کہ ہم آئین، انصاف، آزاد انتخابات اور قومی مفاہمت کی بات کر رہے ہیں تاکہ ملک کو موجودہ سیاسی بند گلی سے نکالا جا سکے، لیکن اگر اب بھی درست راستہ نہ چُنا گیا تو وقت ہاتھ سے نکل جائے گا۔
ان کا کہنا تھا کہ “ہم سچ، عزتِ نفس اور انسانی کرامت کے راستے پر قائم رہیں گے، اور اللہ ہی ہماری آخری امید ہے۔”