پاکستان کی معیشت بحالی کی جانب گامزن، 2025 بہتر سال قرار

ایشیائی ترقیاتی بینک (ADB) نے پاکستان کی معیشت کے حوالے سے اپنی تازہ ترین “ایشیائی ترقیاتی آؤٹ لک” رپورٹ جاری کر دی ہے، جس میں ملکی معیشت کے لیے مثبت اشارے دیے گئے ہیں۔ رپورٹ کے مطابق، مالی سال 2025 میں سخت معاشی پالیسیوں اور اصلاحات کے نتیجے میں معاشی نمو میں بہتری آئی ہے اور مہنگائی میں نمایاں کمی ریکارڈ کی گئی ہے۔ اے ڈی بی نے پیشگوئی کی ہے کہ پاکستان کی معاشی شرحِ نمو 2026 میں 3.5 فیصد رہے گی، جبکہ 2027 میں یہ مزید بہتر ہو کر 4.5 فیصد تک پہنچنے کا امکان ہے۔ رپورٹ میں صنعتی شعبے کی بحالی اور نجی سرمایہ کاری میں اضافے کو معاشی نمو کا بنیادی محرک قرار دیا گیا ہے۔

ادارے نے اپنی رپورٹ میں خبردار کیا ہے کہ مشرقِ وسطیٰ میں حالیہ کشیدگی اور تیل کی قیمتوں میں اتار چڑھاؤ مہنگائی پر دوبارہ دباؤ ڈال سکتا ہے۔ ایشیائی ترقیاتی بینک کے مطابق، 2026 میں مہنگائی کی شرح 6.4 فیصد اور 2027 میں 6.5 فیصد رہنے کی توقع ہے۔ رپورٹ میں یہ بھی بتایا گیا ہے کہ سٹیٹ بینک کی جانب سے مانیٹری پالیسی میں مزید نرمی متوقع ہے، تاہم توانائی اور کھاد کی قیمتوں میں اضافہ معیشت کے لیے چیلنج ثابت ہو سکتا ہے، جس سے زرعی اور صنعتی پیداوار متاثر ہونے کا خدشہ ہے۔

اے ڈی بی نے تعمیراتی شعبے کی بہتری اور سیلاب سے بحالی کے منصوبوں کو معاشی استحکام کے لیے خوش آئند قرار دیا ہے، تاہم واضح کیا ہے کہ پائیدار ترقی کے لیے عالمی غیر یقینی صورتحال سے نبرد آزما ہونا اور معاشی اصلاحات کا تسلسل برقرار رکھنا ناگزیر ہے۔ رپورٹ میں ترسیلاتِ زر میں کمی اور کرنٹ اکاؤنٹ خسارے کے ممکنہ خطرات پر بھی تشویش کا اظہار کیا گیا ہے، جس کے لیے حکومت کو محتاط معاشی پالیسیوں پر عملدرآمد جاری رکھنے کا مشورہ دیا گیا ہے۔