واقعۂ کربلا ہمیں حق کا ساتھ دینے کا درس دیتا ہے: مشعل خان

کراچی: پاکستانی شوبز انڈسٹری کی معروف اداکارہ و میزبان مشعل خان نے واقعۂ کربلا اور یومِ عاشور کی مناسبت سے سوشل میڈیا پلیٹ فارم انسٹاگرام پر ایک انتہائی جذباتی اور فکر انگیز ویڈیو پیغام شیئر کیا ہے، جس میں انہوں نے نواسۂ رسولؐ کی لازوال قربانیوں کو تفصیلی خراجِ عقیدت پیش کیا ہے۔ اپنی ویڈیو میں مشعل خان کا کہنا تھا کہ “بہت سے لوگ پوچھتے ہیں کہ ہم کربلا پر کیوں روتے ہیں، لیکن میرا سوال یہ ہے کہ کیا آپ واقعی جانتے ہیں کہ امام حسینؓ کون تھے؟ کیا آپ نے کبھی حقیقی معنوں میں ان کی شخصیت کو سمجھنے کی کوشش کی؟ وہ امام جنہوں نے اپنا گھر، اپنے ساتھی، اپنے بھائی، بیٹے، حتیٰ کہ اپنے 6 ماہ کے شیر خوار بچے تک اللّٰہ کی راہ میں قربان کر دیے، مگر اپنے ضمیر اور حق کے راستے پر سمجھوتہ نہیں کیا”۔

مشعل خان نے شہدائے کربلا کے مصائب کا تذکرہ کرتے ہوئے کہا کہ اگر مولا عباسؓ، حضرت قاسمؓ، حضرت علی اصغرؓ اور بی بی زینبؓ کے مبارک نام آپ کے لیے محض نام ہیں، تو آپ نے ابھی کربلا کی روح کو نہیں جانا۔ انہوں نے غازی عباس علمدارؓ کے دونوں بازو قلم ہونے، نانا پاکؐ کے ہم شکل جوان بیٹے حضرت علی اکبرؓ کا جسدِ خاکی اٹھانے والے مظلوم باپ اور پیاسے 6 ماہ کے معصوم حضرت علی اصغرؓ کو لگنے والے تیر کے لرزہ خیز مصائب بیان کیے۔ اپنی تحریر کے اختتام پر اداکارہ نے واضح کیا کہ واقعۂ کربلا ہمیں ہر حال میں حق کا ساتھ دینے کا درس دیتا ہے؛ جب تک حق و باطل کی کشمکش باقی ہے، جب تک مظلوم اور ظالم کے درمیان فرق موجود ہے اور جب تک انسانیت زندہ ہے، کربلا صرف تاریخ کا ایک باب نہیں رہے گی بلکہ ہر اُس دل میں زندہ رہے گی جو امام حسینؓ سے محبت رکھتا ہے۔