عامر خان پر ’لو جہاد‘ کا الزام، لارنس بشنوئی گینگ نے بھی قتل کی دھمکی دے دی

بالی ووڈ کے معروف اداکار عامر خان کو بھارت کے بدنامِ زمانہ لارنس بشنوئی گینگ کی جانب سے مبینہ دھمکی دیے جانے کی اطلاعات سامنے آئی ہیں، جس کے بعد بھارتی پولیس نے معاملے کی باقاعدہ جانچ کا آغاز کر دیا ہے۔ مبینہ دھمکی سوشل میڈیا پر وائرل ہونے والی ایک فیس بک پوسٹ اور وائس نوٹ کے ذریعے سامنے آئی، جس میں خود کو گینگ سے وابستہ ظاہر کرنے والے آرزو بشنوئی اور ٹائسن بشنوئی نامی افراد نے عامر خان پر “لو جہاد” کی حمایت کا الزام عائد کرتے ہوئے سنگین نتائج کی دھمکی دی ہے۔ اسی پوسٹ میں راجستھان کے ضلع سری گنگا نگر میں 13 سالہ لڑکی کے مبینہ اغوا اور زیادتی کے واقعے کا حوالہ بھی دیا گیا ہے۔ ممبئی پولیس کو اطلاع ملنے کے بعد تحقیقات شروع کر دی گئی ہیں، تاہم اب تک نہ تو عامر خان اور نہ ہی ان کی ٹیم کی جانب سے کوئی باضابطہ شکایت درج کرائی گئی ہے۔ واضح رہے کہ لارنس بشنوئی گینگ اس سے قبل بھی متعدد مرتبہ بالی ووڈ اداکار سلمان خان کو دھمکیاں دے چکا ہے اور 2024 میں سلمان خان کی ممبئی رہائش گاہ کے باہر ہونے والی فائرنگ کی ذمہ داری بھی اسی گینگ نے قبول کی تھی، جس کا پسِ منظر 1998 کا مبینہ کالے ہرن کا شکار کیس بتایا جاتا ہے