فائیو جی سپیکٹرم نیلامی، پی ٹی اے کی تیاریاں مکمل، انفارمیشن میمورنڈم جلد جاری ہونے کا امکان

پاکستان میں فائیو جی سپیکٹرم کی نیلامی کے معاملے میں اہم پیش رفت سامنے آ گئی ہے۔ ذرائع کے مطابق پاکستان ٹیلی کمیونی کیشن اتھارٹی (پی ٹی اے) نے فائیو جی سپیکٹرم کی نیلامی کے لیے انفارمیشن میمورنڈم (IM) کا مسودہ تیار کر لیا ہے، تاہم اس کے اجراء کے لیے حکومت کی جانب سے پالیسی ڈائریکٹو کا انتظار کیا جا رہا ہے۔

ذرائع کا کہنا ہے کہ اسپیکٹرم ایڈوائزری کمیٹی کی سفارشات کی منظوری کو ایک ہفتہ گزر چکا ہے، مگر تاحال پالیسی ڈائریکٹو جاری نہیں ہو سکا۔ پی ٹی اے حکام کے مطابق پالیسی ڈائریکٹو موصول ہوتے ہی اسپیکٹرم کی بیس پرائس سمیت تمام بنیادی نکات شامل کر کے انفارمیشن میمورنڈم جاری کر دیا جائے گا۔

پی ٹی اے ذرائع کے مطابق انفارمیشن میمورنڈم کے اجراء کے بعد کمپنیوں کو تیاری کے لیے پہلے کے مقابلے میں کم وقت دیا جائے گا، جبکہ فائیو جی سپیکٹرم کی نیلامی کے لیے اتھارٹی اپنی تمام تیاریاں مکمل کر چکی ہے۔ حکام کا کہنا ہے کہ ہر صورت رمضان المبارک سے قبل فائیو جی سپیکٹرم کی نیلامی ہمارا ہدف ہے، اور کوشش ہے کہ رواں ہفتے ہی انفارمیشن میمورنڈم جاری کر دیا جائے۔

پی ٹی اے حکام کے مطابق 600 میگا ہرٹز اسپیکٹرم نیلامی کے لیے پیش کیا جائے گا، جبکہ 2600 میگا ہرٹز بینڈ کا 194 میگا ہرٹز پرائم سپیکٹرم نیلام کیا جائے گا۔ اس کے علاوہ 1800 میگا ہرٹز، 2100 میگا ہرٹز، 700 میگا ہرٹز، 2300 میگا ہرٹز اور 3500 میگا ہرٹز بینڈز بھی نیلامی میں شامل ہوں گے۔

حکام نے بتایا کہ پی ٹی اے کی اولین ترجیح 2600 میگا ہرٹز اور 3500 میگا ہرٹز بینڈ کی نیلامی ہے، جبکہ مجموعی طور پر 300 میگا ہرٹز سے زائد اسپیکٹرم نیلام کرنے کا ہدف مقرر کیا گیا ہے۔