گوگل نے جی میل صارفین کی بڑی مشکل آسان کر دی

گوگل نے طویل عرصے بعد اپنی ایک اہم پالیسی میں تبدیلی متعارف کرانے کا اعلان کر دیا ہے، جس کے تحت اب صارفین اپنے @gmail.com ای میل ایڈریس کو تبدیل کر سکیں گے۔

میڈیا رپورٹس کے مطابق اس سے قبل گوگل صرف تھرڈ پارٹی ای میل ایڈریس استعمال کرنے والے صارفین کو ای میل تبدیل کرنے کی اجازت دیتا تھا، جبکہ @gmail.com ایڈریس کو ناقابلِ تبدیلی قرار دیا جاتا تھا، تاہم اب یہ پالیسی تبدیل کی جا رہی ہے۔

گوگل کا کہنا ہے کہ صارفین اپنے موجودہ گوگل اکاؤنٹ سے منسلک @gmail.com ای میل ایڈریس کو کسی نئے @gmail.com ایڈریس میں تبدیل کر سکیں گے۔ اگرچہ کمپنی نے اس فیچر کی مکمل تکنیکی تفصیلات جاری نہیں کیں، تاہم واضح کیا گیا ہے کہ یہ سہولت تمام صارفین کے لیے دستیاب ہوگی۔

اہم شرائط و ضوابط:

گوگل کے مطابق ای میل ایڈریس تبدیل کرنے کے بعد پرانا ای میل ایڈریس بطور Alias برقرار رہے گا، اور صارفین دونوں ایڈریسز پر موصول ہونے والی ای میلز حاصل کر سکیں گے۔

اکاؤنٹ میں محفوظ تمام ڈیٹا، بشمول تصاویر، پیغامات اور پرانی ای میلز، محفوظ رہیں گی اور کسی قسم کا نقصان نہیں ہوگا۔

صارفین اپنا پرانا گوگل ای میل ایڈریس دوبارہ استعمال کر سکیں گے، تاہم اگلے 12 ماہ تک نیا @gmail.com اکاؤنٹ بنانے کی اجازت نہیں ہوگی، اور اس مدت کے دوران نیا ای میل ایڈریس حذف بھی نہیں کیا جا سکے گا۔

مزید یہ کہ صارفین Gmail، Maps، YouTube، Google Play اور Drive سمیت تمام گوگل سروسز میں پرانے یا نئے دونوں ای میل ایڈریس کے ذریعے سائن اِن کر سکیں گے۔

ٹیکنالوجی ماہرین کے مطابق یہ اپ ڈیٹ صارفین کے لیے زیادہ سہولت اور لچک فراہم کرے گی اور جی میل کے روایتی اور سخت صارف نام کے نظام میں ایک اہم اور مثبت تبدیلی ثابت ہوگی۔