خیبر پختونخوا میں طبی سہولیات کا فقدان، 4 کروڑ سے زائد آبادی کے لیے صرف 8 ہزار ڈاکٹر دستیاب

خیبرپختونخوا میں صحت کی سہولیات اور طبی عملے کی شدید قلت کی تشویشناک صورتحال سامنے آئی ہے، جہاں صوبے کی 4 کروڑ سے زائد آبادی کے لیے صرف 8 ہزار 24 ڈاکٹرز دستیاب ہیں اور یوں ہر 5 سے 6 ہزار افراد کے حصے میں محض ایک ڈاکٹر آتا ہے۔ میڈیا رپورٹس کے مطابق صوبے بھر میں مختلف نوعیت کے 200 سے زائد سرکاری طبی مراکز غیر فعال پڑے ہیں جبکہ سرکاری اسپتالوں میں بستروں کی بھی شدید کمی ہے، جہاں 64 ہزار بستروں کی مجموعی ضرورت کے مقابلے میں صرف 18 ہزار 432 بستر دستیاب ہیں اور یوں 45 ہزار 568 بستروں کا واضح فرق موجود ہے، جس کے باعث مریضوں کو علاج معالجے میں شدید مشکلات کا سامنا ہے۔ دوسری جانب صوبائی مشیر برائے صحت لیفٹیننٹ جنرل (ر) نگار جوہر نے اس حوالے سے بریفنگ دیتے ہوئے بتایا کہ صوبے کے طبی نظام میں بہتری لانے کے لیے میڈیکل ٹیچنگ انسٹی ٹیوشنز (ایم ٹی آئی) ایکٹ میں ترامیم کرنے اور سرکاری اسپتالوں کا آڈٹ کرانے کا فیصلہ کیا گیا ہے، جبکہ صحت کارڈ میں موجود خامیوں کو دور کر کے عوام کو علاج معالجے کی بہتر سہولیات کی فراہمی یقینی بنائی جائے گی۔