پنجاب کے ہسپتالوں میں ڈاکٹرز کی خالی آسامیاں کنٹریکٹ پر پُر کرنے کا فیصلہ

پنجاب کے سرکاری ہسپتالوں اور میڈیکل اداروں میں ڈاکٹرز اور تدریسی عملے کی کمی دور کرنے کے لیے خالی آسامیاں کنٹریکٹ بنیادوں پر پُر کرنے کا فیصلہ کر لیا گیا ہے، جس کے تحت اسسٹنٹ پروفیسر، ایسوسی ایٹ پروفیسر اور پروفیسر کی نشستوں پر بھی کنٹریکٹ تقرریاں کی جائیں گی۔ محکمہ اسپیشلائزڈ ہیلتھ کیئر اینڈ میڈیکل ایجوکیشن پنجاب کی جانب سے تمام میڈیکل یونیورسٹیوں اور ٹیچنگ ہسپتالوں کو جاری کردہ مراسلے کے مطابق نئی پالیسی کے تحت سینئر رجسٹرار اور اسسٹنٹ پروفیسر کی بھرتیاں بی ایس 18، ایسوسی ایٹ پروفیسر کی بی ایس 19 جبکہ پروفیسر کی خالی آسامیوں پر بی ایس 20 میں تین سال کے لیے تقرریاں عمل میں لائی جائیں گی، جن میں تسلی بخش کارکردگی کی بنیاد پر توسیع بھی ممکن ہوگی۔ کلینیکل اور بیسک سائنسز کی مختلف اسپیشلٹیز سمیت ابتدائی بھرتی کے کوٹے کی خالی نشستوں پر بھی اس نئے طریقہ کار کا اطلاق ہوگا جس کی منظوری پنجاب کابینہ نے 19 اکتوبر 2026ء کو دی تھی، جبکہ اس اقدام کا بنیادی مقصد تدریسی عملے کی قلت پر قابو پانا اور مریضوں کو علاج معالجے کی بہتر سہولیات کی فراہمی یقینی بنانا ہے۔