محکمہ صحت پنجاب کے متعدد میڈیکل سپرنٹنڈنٹس کے تقرر و تبادلے کے احکامات جاری

محکمہ صحت پنجاب نے صوبے بھر کے متعدد بڑے سرکاری اور ٹیچنگ ہسپتالوں میں انتظامی بہتری کے لیے بڑے پیمانے پر تقرر و تبادلوں کے احکامات جاری کر دیے ہیں، جن کے تحت کئی افسران کو نئی ذمہ داریاں سونپ دی گئیں جبکہ متعدد میڈیکل سپرنٹنڈنٹس (ایم ایس) کو عہدوں سے ہٹا کر محکمہ صحت کو رپورٹ کرنے کی ہدایت کی گئی ہے۔ جاری کردہ نوٹیفکیشن کے مطابق لاہور میں ڈاکٹر ذیشان حیدر کو ریگولر بنیادوں پر ایم ایس جناح ہسپتال، ڈاکٹر فرح انعام کو ٹیچنگ ہسپتال شاہدرہ، ڈاکٹر محمد شہباز کو میاں منشی ڈی ایچ کیو ہسپتال، ڈاکٹر ظلِ ہما کو لیڈی ولنگڈن ہسپتال جبکہ ڈاکٹر عافیہ زیب کو پنجاب ڈینٹل ہسپتال کا ایم ایس تعینات کیا گیا ہے۔ اسی طرح ملتان میں ڈاکٹر عبدالقادر خان کو نشتر ہسپتال، ڈاکٹر صائمہ بتول سومرہ کو نشتر ٹو اور ڈاکٹر فرحان خان کو چودھری پرویز الٰہی انسٹیٹیوٹ آف کارڈیالوجی کا ایم ایس مقرر کر دیا گیا، جبکہ بہاول وکٹوریہ ہسپتال بہاولپور میں ڈاکٹر سید فخر عباس شاہ، گوجرانوالہ ٹیچنگ ہسپتال میں ڈاکٹر کاشف بشیر چوہدری، ڈی جی خان میں ڈاکٹر محمد عمران خان، ساہیوال میں ڈاکٹر زاہد احمد، گجرات میں ڈاکٹر محمد کاشف شہزاد ورک اور سیالکوٹ، نارووال، میانوالی و رحیم یار خان کے ہسپتالوں میں بھی نئے ایم ایس تعینات کر دیے گئے ہیں۔