جی بی اے 16 دیامر 2 کے 3 پولنگ سٹیشنوں پر پولنگ شروع

گلگت بلتستان اسمبلی کے حلقہ جی بی اے 16 (دیامر 2) کے 3 پولنگ اسٹیشنز پر الیکشن ٹربیونل کے حکم کے تحت دوبارہ پولنگ کا عمل شروع ہو گیا ہے جو بغیر کسی وقفے کے شام 5 بجے تک جاری رہے گا، جبکہ ان تینوں پولنگ اسٹیشنز پر رجسٹرڈ ووٹرز کی مجموعی تعداد 2 ہزار 780 ہے۔ واضح رہے کہ عام انتخابات میں پوسٹل بیلٹس کی گنتی کے بعد پاکستان پیپلز پارٹی کے امیدوار عطاء اللّٰہ شاہ 6 ہزار 618 ووٹ حاصل کر کے محض 13 ووٹوں کی برتری سے کامیاب قرار پائے تھے، تاہم ان کے مدمقابل امیدوار سید امام مالک کی جانب سے تین پولنگ اسٹیشنز پر مبینہ بے ضابطگیوں کو چیلنج کیے جانے پر الیکشن ٹربیونل نے 6 نومبر کو عطاء اللّٰہ شاہ کی اسمبلی رکنیت معطل کرتے ہوئے ان پولنگ اسٹیشنز پر دوبارہ پولنگ کرانے کا حکم جاری کیا تھا۔