اگر پنجاب جاگ جائے تو ملک بھر میں انقلاب برپا ہو سکتا ہے: حافظ نعیم الرحمان

امیرِ جماعتِ اسلامی پاکستان حافظ نعیم الرحمان نے کہا ہے کہ پنجاب کی آبادی ملک کی نصف آبادی سے زیادہ ہے اور اگر پنجاب جاگ جائے تو پورے ملک میں انقلاب برپا ہو سکتا ہے، جبکہ اب وقت آ چکا ہے کہ جماعتِ اسلامی پنجاب میں ایک بڑی سیاسی جماعت اور ملک بھر میں بڑی پارلیمانی قوت بن کر سامنے آئے۔ لاہور میں ’کل پنجاب اجتماعِ ذمہ داران‘ سے خطاب کرتے ہوئے حافظ نعیم الرحمان نے مؤقف اختیار کیا کہ ملک کا سیاسی، سماجی اور معاشی نظام چند طاقتور ہاتھوں میں یرغمال ہے جہاں کبھی آر ٹی ایس بٹھا کر اور کبھی فارم 47 کے ذریعے عوام پر حکومتیں مسلط کی جاتی ہیں، جبکہ ان کے بقول اسٹیبلشمنٹ جہاز بھر بھر کر الیکٹ ایبلز کو سیاسی جماعتوں میں شامل کراتی ہے اور گزشتہ 80 برس سے اسی سائے تلے جماعتیں قوم پر مسلط کی جا رہی ہیں۔ انہوں نے مزید کہا کہ روایتی سیاسی جماعتوں کی باہمی لڑائی عوامی فلاح کے بجائے ذاتی مفادات اور کلٹ، جاگیرداری و سرمایہ داری کے تحفظ کے لیے ہوتی ہے اور ان کے پاس عوامی مسائل کا کوئی حل موجود نہیں، اس لیے رائے عامہ کو ہموار کرتے ہوئے عدل و انصاف پر مبنی نظام قائم کرنے اور حقیقی تبدیلی لانے کے لیے جماعتِ اسلامی ہی واحد مؤثر آپشن ہے۔