خیبرپختونخوا کی سیاسی شخصیات نے جرائم پیشہ گروہ کی سرپرستی کی: اختیار ولی

وزیراعظم کے کوآرڈینیٹر اختیار ولی خان نے الزام عائد کیا ہے کہ خیبرپختونخوا کی متعدد سیاسی شخصیات نے کوہاٹ میں سرگرم ایک مبینہ بدنامِ زمانہ جرائم پیشہ گروہ کو باقاعدہ تحفظ فراہم کر رکھا تھا جس کے عوض بھتہ وصول کیا جاتا تھا۔ پشاور میں پریس کانفرنس کرتے ہوئے اختیار ولی خان نے دعویٰ کیا کہ سابق وزیرِ قانون آفتاب عالم کے حلقے جنگل خیل میں سرگرم اس گروہ کی سرپرستی کرنے والوں میں تحریکِ انصاف کے رکنِ قومی اسمبلی شہریار آفریدی، سینیٹر خرم ذیشان، گمبٹ کے تحصیل چیئرمین ساجد اقبال، پیپلز پارٹی کے رکنِ اسمبلی امجد آفریدی، سابق تحصیل چیئرمین احسان، جمعیت علمائے اسلام کے سابق رہنما سیف اللہ، سابق ضلعی امیدوار نسیم آفریدی اور سابق صوبائی اسمبلی امیدوار ایڈووکیٹ اعظم شامل ہیں۔ انہوں نے وزیراعلیٰ خیبرپختونخوا کے بھائی نوید اور سینیٹر خرم ذیشان کے قریبی عزیز اظہر بخاری کا نام بھی لیتے ہوئے کہا کہ صوبائی وزیر امجد آفریدی سے منسلک ایک دوسرے گروہ کے افراد بھی اس مبینہ نیٹ ورک کا حصہ تھے، جہاں مختلف سیاسی شخصیات نے مل کر گروہ کو تحفظ فراہم کرنے اور بھتے کی رقم وصول کر کے آگے پہنچانے کا پورا نظام قائم کر رکھا تھا۔