یومِ اعلانِ آزادیٔ فلسطین: پاکستان کا آزاد خودمختار ریاست کی حمایت کا اعادہ

پاکستان نے ریاستِ فلسطین کے اعلانِ آزادی کی 38ویں سالگرہ کے موقع پر فلسطین کی حکومت اور عوام کو دلی مبارکباد پیش کرتے ہوئے آزاد اور خودمختار فلسطینی ریاست کے قیام کے لیے اپنی غیر متزلزل حمایت کا اعادہ کیا ہے۔ صدرِ مملکت آصف علی زرداری نے اپنے فلسطینی ہم منصب محمود عباس کے نام تہنیتی خط میں فلسطینی قیادت اور عوام کے لیے نیک تمناؤں کا اظہار کرتے ہوئے کہا کہ پاکستان اور فلسطین کے درمیان گہرے برادرانہ تعلقات قائم ہیں اور پاکستانی عوام فلسطینی بھائیوں کو انتہائی احترام کی نگاہ سے دیکھتے ہیں۔ صدرِ مملکت نے فلسطینی عوام کو درپیش مشکلات پر مکمل یکجہتی کا اظہار کرتے ہوئے پائیدار امن، آزادی اور وقار کے لیے ان کی امنگوں اور ایک آزاد، خودمختار، قابلِ عمل اور متصل فلسطینی ریاست کے قیام کے لیے پاکستان کی اصولی حمایت دہرائی۔ دوسری جانب سماجی رابطے کی ویب سائٹ ’ایکس‘ پر جاری بیان میں دفترِ خارجہ نے بھی واضح کیا کہ حکومت اور پاکستانی عوام اس اہم موقع پر فلسطینیوں کے حقِ خودارادیت کی حمایت پر ثابت قدم ہیں اور اپنے اصولی مؤقف پر قائم رہیں گے۔