پاکستان کے سیاحتی مقامات دنیا میں متعارف کرانے والی مصنفہ آئزوبل شا انتقال کر گئیں

پاکستان کے سیاحتی مقامات، ثقافت اور قدرتی حسن کو اپنی تحریروں کے ذریعے دنیا بھر میں متعارف کرانے والی معروف آئرش نژاد سفری مصنفہ آئزوبل شا 83 برس کی عمر میں سوئٹزرلینڈ کے علاقے سینٹ سرگ میں واقع اپنی رہائش گاہ پر انتقال کر گئیں۔ 1943 میں آئرلینڈ میں پیدا ہونے والی اور کیمبرج یونیورسٹی سے تعلیم یافتہ آئزوبل شا پہلی مرتبہ 1978 میں اپنے شوہر رابرٹ شا کی اسلام آباد میں تعیناتی کے دوران پاکستان آئیں، جہاں تین سالہ قیام کے دوران انہوں نے اردو زبان سیکھی اور 1981 میں ہیلری ایڈمسن کے ساتھ مل کر ’اے ٹریولرز گائیڈ ٹو پاکستان‘ تحریر کی، جس کے بعد ان کی مشہور تصانیف ’پاکستان ہینڈ بک‘ (1989)، ’پاکستان ٹریکنگ گائیڈ‘ (1993) اور ’ٹریکنگ گائیڈ ٹو دی قراقرم اینڈ ہندوکش آف ناردرن پاکستان‘ (2013) شائع ہوئیں جنہوں نے ہزاروں غیر ملکی سیاحوں کو پاکستان سے روشناس کرایا۔ آئزوبل شا نے 1990 کی دہائی میں حکومتِ پاکستان کے ساتھ بطور مشیرِ سیاحت بھی خدمات انجام دیں جبکہ 2005 کے تباہ کن زلزلے کے متاثرین کے علاج کے لیے فنڈز جمع کرنے اور برطانیہ میں پاکستان کے مثبت تشخص کے فروغ پر ’پاکستان سوسائٹی لندن‘ کی جانب سے اعزاز بھی حاصل کیا؛ مرحومہ نے سوگواران میں تین بچے، نو پوتے پوتیاں و نواسے نواسیاں اور ایک پڑنواسی چھوڑی ہیں۔