پاکستان میں ذیابیطس کے مریضوں کی تعداد ساڑھے 3کروڑ سے تجاوز کرگئی: ماہرین کا انکشاف

پاکستان میں ذیابیطس کے مریضوں کی مجموعی تعداد تشویشناک حد تک بڑھتے ہوئے ساڑھے 3 کروڑ سے تجاوز کر چکی ہے، جبکہ ماہرینِ طب نے غیر صحت مند طرزِ زندگی، ناقص خوراک اور جسمانی سرگرمیوں کی کمی کو اس مرض میں تیز رفتار اضافے کی سب سے بڑی وجہ قرار دیا ہے۔

طبی ماہرین کے مطابق ذیابیطس ایک ایسی خاموش بیماری ہے جس کے مریضوں کی تعداد میں ملک بھر میں مسلسل اضافہ ہو رہا ہے۔ ماہرین کا کہنا ہے کہ صرف حیدرآباد میں ہر 5 میں سے ایک شخص کو ذیابیطس کا عارضہ لاحق ہے، اور یہ ایک ایسی بیماری ہے جس میں بروقت احتیاط نہ کرنا دیگر کئی پیچیدہ امراض کا سبب بن سکتا ہے، لہٰذا بڑھتی عمر کے ساتھ باقاعدگی سے شوگر کے ٹیسٹ کو یقینی بنانا اور صحت مند زندگی کے لیے روزانہ واک کرنا سب سے اہم اور ضروری عنصر ہے۔

ڈاکٹرز اور طبی ماہرین نے خبردار کرتے ہوئے کہا ہے کہ ذیابیطس محض جسم میں انسولین کے نہ بننے یا کم بننے تک محدود نہیں رہتی بلکہ اگر اسے کنٹرول نہ کیا جائے تو یہ آنکھوں کی بینائی متاثر ہونے، گردوں کے فیل ہونے اور دل کی خطرناک بیماریوں کا بھی براہِ راست سبب بن سکتی ہے۔ اعداد و شمار کے مطابق پاکستان میں 18 سال سے زائد عمر کے تقریباً 33.5 فیصد یعنی ساڑھے 3 کروڑ افراد اس وقت ذیابیطس کا شکار ہیں۔

عالمی یومِ ذیابیطس (14 نومبر) کے موقع پر طبی ماہرین نے شہریوں کو مشورہ دیا ہے کہ وہ روزانہ کم از کم 30 منٹ تک تیز قدموں سے چلنے کو اپنا معمول بنائیں، گھر کا سادہ اور متوازن کھانا کھائیں اور بازار کے مرغن اور غیر صحت مند کھانوں سے مکمل اجتناب کریں۔ ماہرینِ طب کے مطابق بروقت احتیاط، متوازن غذا اور روزانہ کی جسمانی سرگرمی ہی اس موذی مرض کے خطرات کو کم کرنے اور صحت مند زندگی گزارنے میں کلیدی کردار ادا کر سکتی ہے۔