اسرائیلی فوج کا غزہ میں حماس کے سینئر کمانڈر کو شہید کرنے کا دعویٰ

جنوبی غزہ کے شہر خان یونس میں ایک اسرائیلی فضائی حملے کے نتیجے میں فلسطینی مزاحمتی تنظیم حماس کے عسکری ونگ ’عزالدین القسام بریگیڈز‘ کے سینئر کمانڈر سمیر محمود ابو یونس (معروف بہ ابو محمود) شہید ہو گئے ہیں۔ اسرائیلی فوج کی جانب سے غزہ میں حماس کے ایک سینئر کمانڈر کو نشانہ بنانے کے دعوے کے بعد طبی ذرائع اور غزہ کی سول ڈیفنس ایجنسی کے ترجمان محمود بسال نے تصدیق کی کہ خان یونس کے علاقے المواسی میں ایک سڑک پر ہونے والے اس فضائی حملے میں 53 سالہ سمیر ابو یونس کی لاش برآمد کر لی گئی ہے جبکہ دو افراد زخمی بھی ہوئے ہیں۔ بعد ازاں عزالدین القسام بریگیڈز نے اپنے بیان میں سمیر ابو یونس کی شہادت کی باضابطہ تصدیق کرتے ہوئے بتایا کہ وہ تنظیم کی جنرل ملٹری کونسل کے رکن اور رفح بریگیڈ کے کمانڈر تھے، جنہوں نے 1991 میں القسام بریگیڈز میں شمولیت اختیار کی تھی اور وہ اس کے اولین ارکان میں شمار ہوتے تھے۔