شہید میجر اور حوالدار کی نماز جنازہ ادا، وزیراعظم اور فیلڈ مارشل کی شرکت

بلوچستان کے ضلع نوشکی کے قریب مادرِ وطن کا دفاع کرتے ہوئے جامِ شہادت نوش کرنے والے میجر عمر ناصر منہاس اور حوالدار محمد عدنان خان کی نمازِ جنازہ چکلالہ گیریژن راولپنڈی میں ادا کر دی گئی، جس میں وزیراعظم شہباز شریف اور چیف آف ڈیفنس فورسز فیلڈ مارشل سید عاصم منیر نے شرکت کی۔ پاک فوج کے شعبہ تعلقاتِ عامہ (آئی ایس پی آر) کے مطابق نمازِ جنازہ میں وفاقی وزیرِ اطلاعات عطاء اللہ تارڑ سمیت اعلیٰ سول و عسکری حکام، فوجی جوانوں اور شہداء کے اہلِ خانہ کی بڑی تعداد شریک ہوئی، جبکہ دونوں شہداء نے 14 نومبر کو ضلع نوشکی کے قریب فرض کی ادائیگی کے دوران جامِ شہادت نوش کیا تھا۔ آئی ایس پی آر کا کہنا ہے کہ پاکستان کی مسلح افواج اور پوری قوم شہداء کی اس عظیم قربانی کو خراجِ عقیدت پیش کرتی ہے اور ان کی بہادری، فرض شناسی اور وطن سے غیر متزلزل وابستگی پوری قوم کے لیے باعثِ فخر ہے، جبکہ دونوں شہداء کے جسدِ خاکی ان کے آبائی علاقوں کو روانہ کر دیے گئے ہیں جہاں انہیں مکمل فوجی اعزازات کے ساتھ سپردِ خاک کیا جائے گا۔