محمد یوسف اور ثناء میر پی سی بی ہال آف فیم میں شامل

پاکستان کرکٹ بورڈ (پی سی بی) نے قومی کرکٹ کے لیے غیر معمولی خدمات اور شاندار کارکردگی کے اعتراف میں سابق کپتان محمد یوسف اور سابق ویمن کپتان ثناء میر کو ’پی سی بی ہال آف فیم 2025ء‘ میں شامل کر لیا ہے۔ پی سی بی کے مطابق محمد یوسف کا انتخاب آزادانہ اور شفاف ووٹنگ کے ذریعے کیا گیا جبکہ ثناء میر کو آئی سی سی ہال آف فیم میں شمولیت کی بنیاد پر پی سی بی ہال آف فیم کا حصہ بنایا گیا ہے؛ محمد یوسف نے اپنے انٹرنیشنل کیریئر کے 381 میچز میں 17 ہزار 300 رنز بنانے کے ساتھ ساتھ 2006ء میں ایک کیلنڈر سال کے دوران 1788 ٹیسٹ رنز بنا کر عالمی ریکارڈ قائم کیا تھا، جبکہ ثناء میر نے 226 انٹرنیشنل میچز میں 240 وکٹیں اور 2432 رنز اسکور کیے اور ان کی قیادت میں قومی ویمن ٹیم نے 2010ء اور 2014ء کے ایشین گیمز میں طلائی تمغے جیتے۔ چیئرمین پی سی بی محسن نقوی نے دونوں لیجنڈز کو مبارکباد دیتے ہوئے کہا کہ محمد یوسف اور ثناء میر نے ہمیشہ فخر کے ساتھ پاکستان کی نمائندگی کر کے ملکی کرکٹ میں منفرد مقام بنایا؛ واضح رہے کہ ان دونوں کھلاڑیوں سے قبل عبدالقادر، عبدالحفیظ کاردار، فضل محمود، حنیف محمد، عمران خان، انضمام الحق، جاوید میانداد، مصباح الحق، مشتاق محمد، سعید انور، وسیم اکرم، وقار یونس، یونس خان اور ظہیر عباس سمیت 14 عظیم کرکٹرز اس فہرست کا حصہ بن چکے ہیں۔