جیو جِتسو کی عالمی کانگریس 2026ء، اولمپک شناخت کے حصول کیلئے کوششیں تیز کرنے پر اتفاق

متحدہ عرب امارات کے دارالحکومت ابوظہبی میں انٹرنیشنل جیو جِتسو فیڈریشن کی عالمی کانگریس 2026ء کا کامیاب انعقاد کیا گیا، جس میں جیو جِتسو کے کھیل کو عالمی سطح پر مزید فروغ دینے، اس کے انتظامی نظام کو بہتر بنانے اور اولمپک شناخت کے حصول کے لیے اہم فیصلے کیے گئے۔

اماراتی سرکاری خبر رساں ادارے ’وام‘ کے مطابق اجلاس کے دوران کھیل کے مستقبل، اس کی بین الاقوامی ترقی اور مختلف تنظیمی امور کا تفصیلی جائزہ لیا گیا۔ عالمی کانگریس میں اس بات پر اتفاق کیا گیا کہ جیو جِتسو کی بین الاقوامی حیثیت کو مزید مستحکم بنایا جائے اور اولمپک تحریک میں اس کھیل کو باضابطہ شناخت دلانے کے لیے جاری کوششوں کو تیز کیا جائے۔

اجلاس کے دوران عالمی فیڈریشن کے انتظامی ڈھانچے کو جدید خطوط پر استوار کرنے اور ضروری تنظیمی اصلاحات سے متعلق امور پر بھی غور کیا گیا۔ اس کے علاوہ کانگریس کے شرکاء نے سال 2027ء کے لیے نئے اینٹی ڈوپنگ قواعد کی باضابطہ توثیق کی، جن کا بنیادی مقصد کھیل میں مکمل شفافیت برقرار رکھنا، منصفانہ مقابلوں کو یقینی بنانا اور بین الاقوامی اسپورٹس ضوابط کی سختی سے پابندی کو فروغ دینا ہے۔

کانگریس میں کھلاڑیوں کے لیے انتہائی منظم، محفوظ اور شفاف مسابقتی ماحول کی فراہمی کے ساتھ ساتھ جیو جِتسو کے عالمی معیار کو مزید بلند کرنے کی اہمیت پر بھی زور دیا گیا۔ ابوظہبی میں ہونے والی اس عالمی کانگریس کے فیصلوں کو اس کھیل کے بین الاقوامی فروغ اور مستقبل کی مؤثر تنظیمی حکمت عملی کے حوالے سے ایک انتہائی اہم پیش رفت قرار دیا جا رہا ہے۔