ایمان مزاری، ہادی علی چٹھہ کیس: این سی سی آئی اے کے گواہوں پر جرح مکمل

ایمان مزاری اور ہادی علی چٹھہ کے خلاف متنازعہ ٹویٹس سے متعلق کیس کی سماعت ایڈیشنل ڈسٹرکٹ اینڈ سیشن جج افضل مجوکا نے کی۔ سماعت کے دوران این سی سی آئی اے کے نائب قاصد افضل پر دونوں ملزمان کی جانب سے جرح مکمل کر لی گئی۔

نائب قاصد افضل نے جرح کے دوران بیان دیا کہ ان کے پاس کنٹریکٹ اور سروس کارڈ کی کاپی اس وقت موجود نہیں، جبکہ وہ ڈاک اپنے دستخط کے ساتھ وصول کرتے ہیں۔ ہادی علی چٹھہ نے نشاندہی کی کہ 16 اور 20 اکتوبر 2025 کو موصول ہونے والے خطوط پر وصولی کا وقت درج نہیں اور وصولی کے وقت کے دستخط اور گواہ کے دستخط آپس میں مطابقت نہیں رکھتے۔

عدالت نے ایمان مزاری کو بھی گواہ پر جرح کی ہدایت دی، تاہم ان کے وکیل کی عدم موجودگی پر ایمان مزاری نے ہادی علی چٹھہ کی جرح کو اپناتے ہوئے اپنا احتجاج ریکارڈ کروایا، جسے عدالت نے فیصلے میں شامل کرنے کی یقین دہانی کرائی۔

بعدازاں این سی سی آئی اے کے دوسرے گواہ وسیم پر بھی ایمان مزاری اور ہادی علی چٹھہ نے جرح کی۔ گواہ وسیم نے بتایا کہ وہ گزشتہ پانچ سال سے ایف آئی اے کے کنٹریکٹ ملازم ہیں اور این سی سی آئی اے کے قیام سے اسی ادارے میں خدمات انجام دے رہے ہیں۔ انہوں نے اعتراف کیا کہ آج عدالت میں ان کے پاس این سی سی آئی اے کا سروس کارڈ موجود نہیں بلکہ ایف آئی اے کا کارڈ ہے۔

گواہ نے مزید بتایا کہ وہ اس سے قبل توہین مذہب کے مقدمات میں بھی بطور گواہ پیش ہو چکے ہیں اور ہادی علی چٹھہ ان پر جرح کر چکے ہیں۔ وسیم کے مطابق بعض اوقات نوٹس جاری کیے بغیر بھی ایف آئی آر درج کی جاتی ہے، جبکہ اگر قابل دست اندازی جرم نہ ہو تو نوٹس جاری کیے جاتے ہیں۔