رونالڈو کا فٹبال کے بعد ٹی وی انڈسٹری میں قدم، پہلی سیریز کی پروڈکشن شروع

پرتگال کے عالمی شہرت یافتہ سٹار فٹبالر کرسٹیانو رونالڈو نے کھیل کے میدان سے باہر ایک نئے سفر کا آغاز کرتے ہوئے اپنی پہلی ٹی وی سیریز ’’Day 1s‘‘ کی پروڈکشن شروع کرنے کا باضابطہ اعلان کر دیا ہے۔ غیر ملکی میڈیا رپورٹس کے مطابق رونالڈو نے سوشل میڈیا پلیٹ فارم انسٹاگرام پر مداحوں کو اس منصوبے سے آگاہ کرتے ہوئے بتایا کہ ان کی پہلی ٹی وی سیریز کی تیاری شروع ہو گئی ہے اور اس کی مزید تفصیلات جلد سامنے لائی جائیں گی۔ فٹبال کی دنیا کے پس منظر میں بنائی جانے والی یہ ڈرامہ سیریز ایک بڑی فٹبال ایجنسی کے کاروباری معاملات، طاقت کی کشمکش، معاہدوں اور باہمی تعلقات کے گرد گھومتی ہے، جسے رونالڈو اور برطانوی فلم ساز میتھیو وان کی 2025ء میں قائم کردہ مشترکہ پروڈکشن کمپنی تیار کر رہی ہے۔ اس سیریز میں معروف اداکار ڈیمین لیوس مرکزی فٹبال ایجنٹ اسٹینلے ڈالٹن کا کردار نبھائیں گے، جبکہ سابق فرانسیسی فٹبالر تھیری ہنری اور برطانوی ریپر ڈیو بھی اس منصوبے سے وابستہ ہیں، اور توقع ہے کہ ایگزیکٹو پروڈیوسر کی حیثیت سے کام کرنے والے کرسٹیانو رونالڈو بھی پہلی مرتبہ کسی اسکرپٹڈ ڈرامے میں اداکاری کے جوہر دکھائیں گے۔